امریکا نے گزشتہ 48 گھنٹوں میں جنگ بندی کی خلاف ورزی کی ہے، ایران کا الزام

ایران کی وزارتِ خارجہ نے منگل کے روز الزام عائد کیا ہے کہ امریکا نے گزشتہ 48 گھنٹوں کے دوران جنوبی ساحلی صوبے ہرمزگان میں ایک نازک جنگ بندی کی خلاف ورزی کی ہے، تاہم اس واقعے کی تفصیلات فراہم نہیں کی گئیں۔

یہ الزام ایسے وقت سامنے آیا ہے جب امریکی سینٹرل کمانڈ نے کہا تھا کہ اس کی افواج نے پیر کے روز جنوبی ایران میں میزائل تنصیبات اور ان کشتیوں کو نشانہ بنایا جو خلیج میں بارودی سرنگیں بچھانے کی کوشش کر رہی تھیں، جبکہ ایران کی پاسدارانِ انقلاب نے دعویٰ کیا کہ اس نے امریکی طیاروں پر فائرنگ کی جو اس کی فضائی حدود میں داخل ہونے کی کوشش کر رہے تھے۔

ایرانی وزارتِ خارجہ کے بیان میں کہا گیا ہے کہ ’’امریکی دہشت گرد فوج نے جنگ بندی کے بعد اپنی غیر قانونی اور بلاجواز کارروائیوں کو جاری رکھتے ہوئے گزشتہ 48 گھنٹوں میں ہرمزگان کے علاقے میں جنگ بندی کی سنگین خلاف ورزی کی ہے۔‘‘

مزید کہا گیا کہ تہران ”کسی بھی شر کا جواب دیے بغیر نہیں رہے گا اور ایرانی قوم کے دفاع میں کسی بھی قسم کی ہچکچاہٹ نہیں کرے گا“، تاہم اس کی مزید تفصیل بیان نہیں کی گئی۔

یہ پیش رفت ایسے وقت میں سامنے آئی ہے جب ایران کا ایک اعلیٰ سطح کا وفد قطر میں جاری مذاکرات کے سلسلے میں موجود ہے، جو امریکا کے ساتھ جاری جنگ کے خاتمے کے لیے ایک سفارتی عمل کا حصہ ہے، یہ جنگ 28 فروری کو شروع ہوئی تھی۔