ٹرمپ کی محکمہ انصاف نے 50 امریکی ریاستوں میں انتخابی مبصرین کی تعیناتی کی نشاندہی کر دی

امریکی محکمہ انصاف نے منگل کے روز کہا ہے کہ وہ ملک کی تمام 50 ریاستوں میں انتخابی مبصرین اور نگران تعینات کر رہا ہے۔ محکمے کے مطابق یہ امریکی تاریخ میں انتخابات کی نگرانی کا اب تک کا سب سے بڑا اقدام ہے۔

امریکی محکمہ انصاف کے بیان میں ان ریاستوں کے اندر مخصوص علاقوں کی نشاندہی بھی کی گئی ہے جہاں مبصرین اور نگران تعینات کیے جائیں گے۔

محکمے کے حکام کے مطابق ترجیح ان علاقوں کو دی گئی ہے جہاں ماضی میں ووٹ ڈالنے کے حق تک رسائی کے مسائل سامنے آئے ہیں اور جہاں سخت مقابلے کے باعث ووٹرز کو ہراساں کیے جانے کا خدشہ ہو سکتا ہے۔

صدر ڈونلڈ ٹرمپ کی انتظامیہ نے انتخابی نگرانی کے معاملے پر اپنا مؤقف مزید سخت کرتے ہوئے ریاستوں سے ووٹر رجسٹریشن کا ڈیٹا طلب کیا ہے۔ انتظامیہ کا کہنا ہے کہ ووٹنگ پر عوامی اعتماد برقرار رکھنے کے لیے سخت اقدامات ضروری ہیں، تاہم ناقدین ان کوششوں کو وفاقی حکومت کی جانب سے ریاستی اختیارات میں مداخلت قرار دیتے ہیں۔

وفاقی نگرانی کے اس وسیع پروگرام کے باعث کئی ریاستوں نے مقامی انتخابی حکام اور پولنگ عملے کے لیے نئی ہدایات جاری کی ہیں، جن میں محکمہ انصاف کے مبصرین کے محدود اختیارات کی وضاحت کی گئی ہے۔

محکمہ انصاف کے بیان میں کہا گیا ہے کہ انتخابی مبصرین وفاقی شہری حقوق کے قوانین پر عمل درآمد کی نگرانی کریں گے، جن کا نفاذ محکمہ انصاف کے شہری حقوق ڈویژن کے دائرہ اختیار میں آتا ہے۔

بعض ریاستوں اور مقامی قوانین کے تحت انتخابی حکام محکمہ انصاف کے مبصرین کو پولنگ اسٹیشنوں کے اندر موجودگی سے روک سکتے ہیں۔ محکمہ انصاف کا عملہ موقع پر تحقیقات نہیں کر سکتا اور نہ ہی کسی ووٹر کو ووٹ ڈالنے سے روکنے کا اختیار رکھتا ہے۔

اس بار تعینات کیے جانے والے مبصرین کی تعداد گزشتہ وسط مدتی انتخابات کے مقابلے میں تقریباً تین گنا ہے۔ یہ محکمہ انصاف کی تاریخ میں انتخابی نگرانی کا سب سے بڑا آپریشن ہوگا۔