برطانوی پاکستانی ریسنگ اسٹار کی رہنمائی میں نوجوان ڈرائیور فیراری ڈرائیور اکیڈمی میں شامل

برطانوی پاکستانی ریسنگ ڈرائیور اور موٹر اسپورٹس کی کاروباری شخصیت انعام احمد نے اپنے کم عمر شاگرد ڈینیئل میرون لورینتے کو ایک سال کی کوچنگ اور رہنمائی کے بعد معروف فیراری ڈرائیور اکیڈمی میں جگہ دلوا کر ڈرائیوروں کی تربیت کے شعبے میں اہم کامیابی حاصل کی ہے۔

احمد گزشتہ 12 ماہ سے ایلیٹ ڈرائیور ڈیولپمنٹ کے تحت ہسپانوی ڈرائیور کی کوچنگ، مینجمنٹ اور پیشہ ورانہ تربیت کر رہے تھے۔ یہ پروگرام انہوں نے ایک سال قبل شروع کیا تھا۔

اس کامیابی کو ان کے تربیتی منصوبے کے لیے ایک اہم سنگِ میل قرار دیا جا رہا ہے، جبکہ لورینتے کا انتخاب نوجوان ڈرائیور کے کیریئر میں ایک بڑی پیش رفت ہے۔

2013 میں پیدا ہونے والے لورینتے کو عالمی کارٹنگ کے ایک باصلاحیت نوجوان ڈرائیور کے طور پر دیکھا جاتا ہے، جہاں وہ بدستور مقابلوں میں حصہ لے رہے ہیں۔ فیراری ڈرائیور اکیڈمی کے لیے ان کا انتخاب سی او ٹی ایف یورو سیریز چیمپئن شپ جیتنے کے تقریباً ایک ماہ بعد سامنے آیا ہے۔

اس پیش رفت کا اعلان کرتے ہوئے ایلیٹ ڈرائیور ڈیولپمنٹ نے کہا کہ اسے فخر ہے کہ پروگرام کے آغاز کے محض 12 ماہ بعد اس کے ڈرائیور نے فیراری ڈرائیور اکیڈمی میں جگہ حاصل کرلی۔

ادارے نے اس کامیابی کا سہرا ایک سال کی محنت، لگن اور اعتماد کو دیتے ہوئے اسے لورینتے کے ریسنگ کیریئر میں ایک اہم قدم قرار دیا۔