ہاتھ سے بنے قالینوں کی بین الاقوامی نمائش کا افتتاح، بین الاقوامی خریداروں کی بھرپور شرکت

ٹریڈ ڈیولپمنٹ اتھارٹی آف پاکستان (ٹڈاپ) کے چیف ایگزیکٹو فیض احمد چدھڑ نے لاہور میں ہاتھ سے بنے قالینوں کی 42ویں بین الاقوامی نمائش کا افتتاح کیا۔ انہوں نے کہا کہ پاکستان کے لیے ایک ایک ڈالر انتہائی قیمتی ہے جبکہ صنعت کو حکومت کی جانب سے مکمل تعاون کی یقین دہانی کراتے ہوئے ویزا سے متعلق مشکلات جلد از جلد حل کرنے کا وعدہ کیا۔

پاکستان کارپٹ مینوفیکچررز اینڈ ایکسپورٹرز ایسوسی ایشن (پی سی ایم ای اے) کے زیر اہتمام مقامی ہوٹل میں منعقد ہونے والی تین روزہ نمائش میں امریکا، جرمنی، ترکیہ، چین، روس اور سویڈن سمیت دیگر ممالک سے بڑی تعداد میں بین الاقوامی خریدار شریک ہیں۔

افتتاحی تقریب میں اعلیٰ حکام اور کاروباری برادری کے ارکان نے شرکت کی۔ شرکا میں ڈائریکٹر ٹیکسٹائلز اینڈ لیدر عارف اللہ، پی سی ایم ای اے کے سرپرستِ اعلیٰ عبد اللطیف ملک، سینئر وائس چیئرمین ناردرن زون خواجہ میر مدثر، وائس چیئرمین ندیم ساجد، نمائش کے چیئرمین ریاض احمد اور کارپٹ ٹریننگ انسٹی ٹیوٹ کی چیئرپرسن اعجاز الرحمن شامل تھے۔

اس موقع پر چیف ایگزیکٹو ٹڈاپ نے اسٹالز کا دورہ کیا اور وہاں رکھے گئے اعلیٰ معیار کے ہاتھ سے بنے قالینوں میں گہری دلچسپی کا اظہار کیا جن میں نفیس اور جدید ڈیزائن نمایاں تھے۔ انہوں نے پاکستانی ہنرمندوں کی کاریگری اور مہارت کو سراہا۔

غیر ملکی خریداروں اور صنعتی نمائندوں سے خطاب کرتے ہوئے فیض احمد چدھڑ نے کہا کہ پاکستانی ہاتھ سے بنے قالینوں نے اعلیٰ معیار اور پرکشش ڈیزائن کے باعث عالمی منڈیوں میں منفرد شناخت حاصل کی ہے۔ انہوں نے کہا کہ اس شعبے میں برآمدات مزید بڑھانے کی نمایاں صلاحیت موجود ہے جس سے بھرپور استفادہ کیا جاسکتا ہے۔ انہوں نے کہا کہ حکومت صنعت کو ہر ممکن تعاون فراہم کررہی ہے اور آئندہ بھی اس تعاون میں مزید اضافہ جاری رکھے گی۔

فیض احمد چدھڑ نے کہا کہ وزیراعظم شہباز شریف برآمدات کے فروغ کی بنیاد پر قومی معیشت کی تعمیر کے لیے پُرعزم ہیں، اسی لیے برآمدی صنعتوں کو زیادہ سے زیادہ سہولیات اور معاونت فراہم کی جارہی ہے۔

شعبے کو درپیش چیلنجز کا اعتراف کرتے ہوئے ٹڈاپ کے چیف ایگزیکٹو نے کہا کہ حکومت ان مسائل سے پوری طرح آگاہ ہے۔ انہوں نے بتایا کہ نمائش کے دوران ویزا سے متعلق مسائل بھی سامنے آئے ہیں اور شرکا کو یقین دہانی کرائی کہ انہیں جلد از جلد حل کرنے کے لیے کوششیں جاری ہیں۔

انہوں نے تبدیلی کی ضرورت پر زور دیتے ہوئے کہا کہ ہاتھ سے بنے قالینوں کی صنعت کو جدت کی جانب بڑھنا ہوگا جبکہ سرکاری اور نجی شعبوں کے درمیان خلیج بھی ختم کرنا ضروری ہے۔ انہوں نے مزید کہا کہ اسی تناظر میں برآمدات کے فروغ کو خصوصی ترجیح دی جارہی ہے۔

نمائش میں پنجاب کی جیلوں میں قیدیوں کی جانب سے تیار کیے گئے ہاتھ سے بنے قالینوں کا اسٹال بھی قائم کیا گیا ہے۔