وزیر خزانہ اور ناگراجن کی ملاقات، برٹش انٹرنیشنل انویسٹمنٹ کے پاکستان میں سرمایہ کاری منصوبوں پر گفتگو

وفاقی وزیر خزانہ و محصولات سینیٹر محمد اورنگزیب نے برٹش انٹرنیشنل انویسٹمنٹ (بی آئی آئی) کے ایشیا کے منیجنگ ڈائریکٹر اور سربراہ سرینی ناگراجن سے ملاقات کی، جس میں پاکستان میں بی آئی آئی کی سرمایہ کاری بڑھانے اور ترجیحی شعبوں میں نجی سرمایہ کاری متحرک کرنے کے مواقع پر تبادلہ خیال کیا گیا۔

ملاقات میں پاکستان کے لیے بی آئی آئی کے سرمایہ کاری منصوبوں، نجی سرمایہ، انفرااسٹرکچر، موسمیاتی فنانس، نجی ایکویٹی، چھوٹے اور درمیانے درجے کے کاروباروں کی مالی معاونت اور جاری معاشی و ساختی اصلاحات سے پیدا ہونے والے نئے سرمایہ کاری مواقع پر گفتگو ہوئی۔

سرینی ناگراجن نے وزیر خزانہ کو بی آئی آئی کی 2026 تا 2031 کی سرمایہ کاری حکمت عملی سے آگاہ کیا، جس کے تحت ادارہ ایشیا اور افریقہ میں کم از کم 2 ارب ڈالر کی سرمایہ کاری کرے گا، جبکہ جنوبی ایشیا اور ابھرتی ہوئی مارکیٹوں پر خصوصی توجہ ہوگی۔ انہوں نے پاکستان کو اہم سرمایہ کاری مرکز قرار دیتے ہوئے ملک میں سرمایہ کاری نمایاں طور پر بڑھانے میں دلچسپی کا اظہار کیا۔

وزیر خزانہ نے پاکستان میں بی آئی آئی کی مسلسل دلچسپی کا خیرمقدم کرتے ہوئے کہا کہ معاشی استحکام، سرمایہ کاروں کے اعتماد، نجکاری اور ساختی اصلاحات میں نمایاں پیش رفت ہوئی ہے۔ انہوں نے 3 ارب ڈالر کی کامیاب عالمی بانڈز جاری کرنے، نجکاری میں پیش رفت اور خودمختار کریڈٹ ریٹنگز میں بہتری کو پاکستان کی معاشی سمت پر بڑھتے اعتماد کی عکاسی قرار دیا۔

فریقین نے موسمیاتی فنانس، قابل تجدید توانائی، بجلی کی ترسیل، انفرااسٹرکچر اور نجی ایکویٹی میں تعاون کے امکانات پر بھی تبادلہ خیال کیا۔ بی آئی آئی نے پاکستان میں قابل عمل مالیاتی ڈھانچے تشکیل دینے کے لیے بین الاقوامی تجربہ اور مہارت فراہم کرنے کی پیشکش کی۔

محمد اورنگزیب نے ٹیکس، توانائی، ٹیرف پالیسی، کیپیٹل مارکیٹس اور ڈیجیٹلائزیشن میں جاری اصلاحات سے وفد کو آگاہ کیا۔ انہوں نے ایس ایم ایز، زراعت اور دیگر کم سہولت یافتہ شعبوں کے لیے مالی رسائی بڑھانے کے حکومتی اقدامات بھی اجاگر کیے۔

دونوں جانب سے پاکستان کے ترجیحی شعبوں میں سرمایہ کاری، معلومات کے تبادلے اور نجی سرمائے کے فروغ کے لیے قریبی رابطہ برقرار رکھنے پر اتفاق کیا گیا۔

کاپی رائٹ بزنس ریکارڈر، 2026