کراچی سمیت ملک بھر میں مخصوص تعمیراتی زونز کے قیام کا مطالبہ

آباد کے چیئرمین محمد حسن بخشی نے تعمیراتی صنعت کے فروغ کے لیے کراچی سمیت ملک بھر میں مخصوص ’تعمیراتی زونز‘ قائم کرنے کا مطالبہ کیا ہے۔

ایک تقریب سے خطاب کرتے ہوئے انہوں نے بیرونِ ملک مقیم پاکستانیوں کے لیے رہائشی سہولیات کے حصول کا عمل آسان بنانے پر زور دیا، تاکہ ملک میں ترسیلاتِ زر کا بہاؤ بڑھایا جاسکے۔

حسن بخشی نے کہا کہ بینکوں کے ذریعے 30 ہزار سے 40 ہزار ہاؤسنگ فنانس درخواستیں پہلے ہی منظور ہوچکی ہیں، تاہم رہائشی یونٹس کی فراہمی اب بھی طلب سے کم ہے۔

انہوں نے کہا کہ آباد وزیراعظم کی زیرصدارت اجلاسوں میں ہاؤسنگ مارکیٹ میں رسد بڑھانے کا معاملہ مسلسل اٹھاتا رہا ہے۔ ان کے مطابق یہ قابلِ قبول نہیں کہ خریدار 30 سال تک اقساط ادا کرتے رہیں جبکہ تعمیراتی منصوبے بھی اتنے ہی عرصے میں مکمل ہوں۔

انہوں نے کہا کہ ایک کروڑ سے زائد پاکستانی بیرونِ ملک مقیم ہیں، اس لیے انہیں پاکستان میں گھر بنانے اور سرمایہ کاری کے بہتر مواقع فراہم کرنا ضروری ہے۔

دریں اثنا میزان بینک کے چیف ایگزیکٹو آفیسر سید عامر علی نے بتایا کہ وزیراعظم کی اپنا گھر ہاؤسنگ اسکیم کے تحت 22 ارب روپے سے زائد کی ہاؤسنگ فنانس درخواستیں موصول ہوئی ہیں، جن میں سے تقریباً 4 ارب روپے جاری کیے جاچکے ہیں۔

انہوں نے تعمیراتی سرگرمیوں کے فروغ میں بلڈرز اور ڈویلپرز کے کردار کو اہم قرار دیتے ہوئے کہا کہ منصوبوں کے لیے فنانسنگ کے حصول میں قانونی پیچیدگیاں دور کرنے کے لیے ایک خصوصی کمیٹی قائم کی جانی چاہیے۔