سندھ میں اسکولوں کے نئے اوقات کار کا اعلان، اطلاق 6 اگست سے

سندھ اسکول ایجوکیشن ڈیپارٹمنٹ نے صوبے بھر میں اسکولوں کے اوقات کار میں تبدیلی کا نیا نوٹیفکیشن جاری کردیا ہے، جس کے تحت نئے اوقات کار کا اطلاق 6 اگست سے ہوگا۔

نئے شیڈول کے تحت تمام سرکاری اسکول، بشمول سنگل اور ڈبل شفٹ ادارے، آئندہ احکامات تک نظرثانی شدہ اوقات کار پر سختی سے عمل کرنے کے پابند ہوں گے۔

سنگل شفٹ پرائمری اسکولوں کے لیے 6 اگست سے 31 اکتوبر تک پیر سے جمعرات اسکول کے اوقات صبح 8 بجے سے دوپہر 2:30 بجے تک ہوں گے، جبکہ جمعہ کو اسکول صبح 8 بجے سے دوپہر 1 بجے تک کھلیں گے۔

یکم نومبر سے 31 مارچ تک سنگل شفٹ پرائمری اسکولوں کے اوقات صبح 8:30 بجے سے سہ پہر 3 بجے تک ہوں گے۔

محکمہ تعلیم نے ڈبل شفٹ ایلیمنٹری، سیکنڈری اور ہائر سیکنڈری اسکولوں کے اوقات کار میں بھی تبدیلی کی ہے۔ 6 اگست سے 31 اکتوبر تک پہلی شفٹ صبح 7:30 بجے سے دوپہر 1:30 بجے تک ہوگی۔

یکم نومبر سے 31 مارچ تک پہلی شفٹ کے اوقات صبح 8 بجے سے دوپہر 1:45 بجے تک ہوں گے۔

اسی طرح 6 اگست سے 31 اکتوبر تک دوسری شفٹ دوپہر 1 بجے سے شام 6 بجے تک جاری رہے گی، جبکہ یکم نومبر سے 31 مارچ تک دوسری شفٹ کے اوقات دوپہر 12:45 بجے سے شام 5:45 بجے تک ہوں گے۔

سرکلر میں سنگل شفٹ ایلیمنٹری، سیکنڈری اور ہائر سیکنڈری اسکولوں سمیت ڈبل شفٹ پرائمری اسکولوں کی پہلی اور دوسری شفٹ کے لیے بھی نظرثانی شدہ اوقات کار مقرر کیے گئے ہیں۔

سندھ محکمہ تعلیم نے تمام متعلقہ افسران اور اسکول سربراہان کو نئے شیڈول پر فوری عمل درآمد یقینی بنانے کی ہدایت کی ہے۔

سرکلر کے مطابق نظرثانی شدہ اوقات کار آئندہ احکامات تک نافذ العمل رہیں گے۔