روسی وزیر خارجہ امریکا کے ساتھ اقتصادی تعلقات پر ناامید

روسی وزیر خارجہ سرگئی لاوروف نے کہا ہے کہ روس امریکا کے ساتھ تعاون کے لیے بدستور تیار ہے، تاہم یوکرین جنگ کے خاتمے کی امریکی کوششوں کے باوجود دونوں ممالک کے درمیان اقتصادی تعلقات کے مستقبل کے حوالے سے کوئی خاص امید نہیں۔ یہ بات انہوں نے پیر کو شائع ہونے والے ایک انٹرویو میں کہی۔

روس کے میڈیا ادارے ٹی وی برکس سے گفتگو کرتے ہوئے سرگئی لاوروف نے کہا کہ امریکا کا واضح ہدف عالمی سطح پر اقتصادی بالادستی قائم رکھنا ہے، جس کے باعث روس کو اقتصادی شعبے میں کسی مثبت پیش رفت کی توقع نہیں۔ ان کے مطابق اگرچہ ماضی میں روسی حکام، بشمول خصوصی ایلچی کریل دمتریئیف، یوکرین میں ممکنہ امن معاہدے کے بعد امریکا کے ساتھ اقتصادی تعلقات کی بحالی کے امکانات کا ذکر کرتے رہے ہیں، لیکن عملی صورت حال مختلف ہے۔

سرگئی لاوروف نے نشاندہی کی کہ امریکی صدر ڈونلڈ ٹرمپ نے بھی ماسکو کے ساتھ اقتصادی تعاون کی بحالی کی بات کی اور وائٹ ہاؤس واپسی کے بعد روسی صدر ولادیمیر پیوٹن کی میزبانی بھی کی، تاہم اس کے ساتھ ہی روس کے اہم توانائی کے شعبے پر مزید سخت پابندیاں عائد کی گئیں، جو تعلقات میں رکاوٹ کا باعث بن رہی ہیں۔

روسی وزیر خارجہ نے برکس اتحاد کے حوالے سے بھی امریکا کے رویے پر تنقید کی۔ ان کا کہنا تھا کہ امریکا خود اس راستے میں مصنوعی رکاوٹیں کھڑی کر رہا ہے، جبکہ روس، چین، بھارت، برازیل اور دیگر ترقی پذیر معیشتوں پر مشتمل برکس بلاک کے ساتھ تعاون ناگزیر ہوتا جا رہا ہے۔

سرگئی لاوروف کے مطابق روس کو مجبوراً برکس ممالک کے ساتھ مالی، اقتصادی اور لاجسٹک منصوبوں کی ترقی کے لیے متبادل اور محفوظ راستے تلاش کرنا پڑ رہے ہیں۔