نئے ڈیزائن کے کرنسی نوٹوں میں سکیورٹی فیچرز مزید بہتر ہوں گے، سینیٹ کمیٹی کو بریفنگ

سینیٹ کی قائمہ کمیٹی برائے خزانہ کو بدھ کوآگاہ کیا گیا کہ اسٹیٹ بینک نے جدید سیکیورٹی فیچرز کے حامل کرنسی نوٹوں کے نئے ڈیزائن کو حتمی شکل دے دی اور انہیں منظوری کیلئےوفاقی کابینہ کو بھیج دیا ہے۔

سینیٹر سلیم مانڈوی والا کی زیرِ صدارت کمیٹی کا اجلاس ہوا جس میں ریگولیٹری اداروں میں اعلیٰ تقرریوں، بجٹ کی تقسیم اور وزارت خزانہ کے پبلک سیکٹر ڈیولپمنٹ پروگرام سے متعلق امور کا جائزہ لیا گیا۔

گورنر اسٹیٹ بینک جمیل احمد نے کمیٹی کو بریفنگ دیتے ہوئے بتایا کہ نئے بینک نوٹوں کی اسٹیٹ بینک بورڈ سے جانچ پڑتال مکمل کرlی گئی، انہیں جعلی کرنسی کی روک تھام کے لیے ڈیزائن کیا گیا ہے۔ انہوں نے کہا کہ ڈیزائن منظوری کے لیے کابینہ کو بھیج دیے گئے ہیں، منظوری ملتے ہی مرکزی بینک ان کی پرنٹنگ کا عمل شروع کر دے گا۔

چیئرمین کمیٹی سلیم مانڈوی والا نے اس پیش رفت کا خیرمقدم کیا اور کمیٹی کی اس دیرینہ سفارش کو دہرایا کہ کرنسی نوٹوں کو جدید بنایا جائے اور ان کے حفاظتی فیچرز کو مزید مضبوط کیا جائے۔

قبل ازیں اسٹیٹ بینک نے کہا تھا کہ کابینہ کی منظوری کے بعد دو سے تین مختلف مالیت کے نئے ڈیزائن کےنوٹوں کی بیک وقت چھپائی شروع کی جائے گی جبکہ اسٹاک کی کم از کم سطح مکمل ہونے پر ان نوٹوں کو مرحلہ وار گردش میں لایا جائے گا۔

تاہم انہوں نے اس بات کا انکشاف کرنے سے گریز کیا کہ کون سی مالیت کے نوٹ سب سے پہلے گردش میں لائے جائیں گے۔ اس وقت مارکیٹ میں 10، 20، 50، 75، 100، 500، 1000 اور 5000 روپے کی مختلف مالیت کے نوٹ گردش میں ہیں۔

واضح رہے کہ اسٹیٹ بینک نے 2026 کے اپنے مانیٹری پالیسی کمیٹی کے پہلے اجلاس میں بنیادی پالیسی ریٹ کو 10.5فیصد پر برقرار رکھنے کا فیصلہ کیا ہے۔