پاکستان ٹریول مارٹ اور اسٹیک ہولڈرز کا معیشت میں سیاحت کا حصہ بڑھانے کا عزم

پاکستان ٹریول مارٹ (پی ٹی ایم) اور سیاحت کی صنعت سے وابستہ اسٹیک ہولڈرز نے ملک بھر میں مقامی اور غیر ملکی سیاحوں کو سہولتیں فراہم کرنے اور باہمی تعاون و شراکت داری کے ذریعے قومی معیشت میں اپنا حصہ بڑھانے کا عزم ظاہر کیا ہے۔

پی ٹی ایم نے مختلف شراکت داروں بشمول ای آر جی، ساؤتھ ایئر، میریٹ ہوٹل اور سندھ ٹورازم ڈویلپمنٹ کارپوریشن (ایس ٹی ڈی سی) کے ساتھ متعدد مفاہمتی یادداشتوں پر دستخط کیے ہیں۔ یہ معاہدے 3 سے 5 اپریل 2026 کو منعقد ہونے والے پی ٹی ایم ٹریڈ فیئر کے پانچویں ایڈیشن کے سلسلے میں کیے گئے ہیں۔ پاکستان ٹریول مارٹ کے سی ای او سید محمد علی ہمدانی نے کہا کہ پاکستان میں سیاحت فروغ پا رہی ہے، تاہم ملک کے مختلف قدرتی، ثقافتی اور ورثہ والے مقامات کی جانب مزید بین الاقوامی سیاحوں کو راغب کرنے کے لیے حکومت اور نجی شعبے کے درمیان مضبوط شراکت داری کی ضرورت ہے۔

انہوں نے کہا کہ ہاسپیٹلٹی سیکٹر ، لاجسٹکس فراہم کرنے والوں اور ٹور آپریٹرز کے درمیان مشترکہ کوششوں، ہم آہنگی اور باہمی تعاون کے ذریعے سیاحت کے شعبے کو مزید مستحکم کیا جا سکتا ہے اور قومی معیشت میں اس کے حصے کو بڑھایا جا سکتا ہے۔

فضلِ ربی گروپ کے چیف آپریٹنگ آفیسر کین مارشل نے کہا کہ پاکستان اپنے قدرتی اور تاریخی مقامات کی بدولت سیاحوں کو راغب کرنے کی بے پناہ صلاحیت رکھتا ہے، بشرطیکہ سیاحتی علاقوں میں معاون انفرااسٹرکچر تیار کیا جائے اور جدید سہولیات فراہم کی جائیں۔

انہوں نے مزید کہا کہ سیاحتی شعبے میں سرمایہ کاری سے دنیا بھر کے سیاحوں کو متوجہ کرنے، غیر ملکی زرِ مبادلہ ذخائر میں اضافہ کرنے اور عالمی سطح پر ملک کا مثبت اور سافٹ امیج بنانے میں مدد ملے گی۔

میریٹ ہوٹل کے جنرل منیجر رضا عباس نے کہا کہ پاکستان نے ہاسپیٹلٹی شعبے میں خدمات کے معیار کو اعلیٰ سطح پر برقرار رکھا ہے جس کی وجہ سے عالمی سطح پر اس کی درجہ بندی میں مسلسل بہتری آ رہی ہے۔ انہوں نے اس بات پر زور دیا کہ غیر ملکی سیاحوں کے لیے بھرپور کشش پیدا کرنے کے لیے سیاحت اور ہاسپیٹلٹی کے مختلف شعبوں کو الگ الگ کام کرنے کے بجائے طویل مدتی بنیادوں پر باہمی اشتراک سے کام کرنا چاہیے۔

ساؤتھ ایئر کے ڈپٹی سی ای او، اے وی ایم (ریٹائرڈ) اعجاز ملک نے ہوا بازی (ایویشن)، ہاسپیٹلٹی اور سیاحت کے درمیان بڑھتی ہوئی ہم آہنگی پر زور دیتے ہوئے کہا کہ ساؤتھ ایئر نہ صرف غیر ملکی اور ملکی سیاحوں کے لیے فائدہ مند ثابت ہو گی بلکہ مقامی اور بین الاقوامی کاروباری مسافروں کو بھی سہولت فراہم کرے گی کیونکہ ہمارا مقصد ملک بھر کے پسماندہ علاقوں کے لیے فضائی سفر کو آسان، موثر اور سستا بنانا ہے۔

اسٹیک ہولڈرز نے اس بات پر روشنی ڈالی کہ حکومت اور نجی شعبے کو سیاحتی صنعت کے لیے ایک پرکشش ایکو سسٹم بنانا چاہیے تاکہ مختلف سرمایہ کاروں اور تاجروں کو راغب کیا جا سکے جس سے ملک میں ایڈونچر، بزنس، مذہبی، ثقافتی، طبی اور کھیلوں کی سیاحت کو مزید فروغ ملے گا۔