مریم نواز کا سوہنا پنجاب پروگرام : صوبے کے 51 شہروں میں ترقیاتی کاموں کا آغاز

وزیراعلیٰ پنجاب مریم نواز شریف کے فلیگ شپ پروگرام ”مریم نواز کا سوہنا پنجاب“ کے تحت صوبے کے 51 شہروں میں ترقیاتی کاموں کا باقاعدہ آغاز کر دیا گیا ہے۔ اس منصوبے کا مقصد شہری انفرااسٹرکچر اور بنیادی سہولیات کو بہتر بنانا ہے۔

وزیراعلیٰ نے پہلے مرحلے کی تکمیل کے لیے جون 2026ء کی ڈیڈ لائن مقرر کی ہے اور شفافیت و معیار کو یقینی بنانے کے لیے وہ خود اس منصوبے کی براہِ راست نگرانی کر رہی ہیں۔ عملدرآمد کی ریئل ٹائم مانیٹرنگ کے لیے صوبائی اور ضلعی سطح پر کنٹرول رومز بھی قائم کیے جا رہے ہیں۔

منصوبے کے تحت 51 شہروں میں 5,887 کلومیٹر طویل سیوریج لائنیں، 181 نکاسی آب کی لائنیں اور 33,000 سے زائد نئے مین ہول کورز نصب کیے جائیں گے۔ اجلاس میں ملتان، گوجرانوالہ، ڈیرہ غازی خان، شیخوپورہ، وہاڑی، بھکر، وزیر آباد اور قصور کے ڈپٹی کمشنرز نے بریفنگ دی۔

ملتان میں 232 کلومیٹر سیوریج لائنوں اور اہم شاہراہوں کی خوبصورتی پر کام ہو رہا ہے، جبکہ گوجرانوالہ میں شہر کی تاریخ کا سب سے بڑا ترقیاتی پیکیج دیا گیا ہے جس میں ویسٹ واٹر ٹریٹمنٹ پلانٹ بھی شامل ہے۔

ڈیرہ غازی خان میں 12 ارب روپے سے زائد کے سیوریج منصوبے اور مانیکا کینال کی بحالی، جبکہ بھکر میں سولر پاورڈ ڈسپوزل اسٹیشنز اور عوامی پارکس تعمیر کیے جائیں گے۔

وزیراعلیٰ نے قصور کے ڈی ایچ کیو اسپتال کی اپ گریڈیشن کو سراہا اور پتوکی میں سیوریج سسٹم کی فوری بحالی کا حکم دیا۔ انہوں نے واضح کیا کہ ان منصوبوں کا مقصد پنجاب کی ہر گلی اور محلے تک ترقی کے ثمرات پہنچانا ہے، جس میں کسی قسم کی تاخیر یا غفلت برداشت نہیں کی جائے گی۔