وزیر اعظم نے بجلی کی تقسیم اور پیدا کرنے والی کمپنیوں کی نجکاری کا عمل تیز کرنے کی ہدایت کر دی

وزیراعظم شہباز شریف نے بجلی کی تقسیم کار (ڈسکوز) اور بجلی پیدا کرنے والی کمپنیوں (جینکوز) کی نجکاری کے عمل کو تیز کرنے کی ہدایت کر دی۔ وزیر اعظم آفس کے مطابق شہباز شریف نے اس بات پر زور دیا کہ نجکاری کے ذریعے مسابقتی بجلی مارکیٹ کا قیام ہی ملک کے توانائی مسائل کا واحد پائیدار حل ہے۔

اسلام آباد میں بجلی کے شعبے میں اصلاحات سے متعلق جائزہ اجلاس کی صدارت کرتے ہوئے وزیراعظم شہباز شریف نے ہدایت کی کہ بجلی کے ترسیلی نظام کو بہتر بنانے کے لیے جاری ترقیاتی منصوبے ترجیحی بنیادوں پر مکمل کیے جائیں۔

انہوں نے مزید ہدایت کی کہ جدید تقاضوں سے ہم آہنگ بجلی نظام کے لیے بیٹری انرجی اسٹوریج سسٹم پر کام پبلک پرائیویٹ پارٹنرشپ کے تحت شروع کیا جائے، جس میں نجی شعبے کی بھرپور شمولیت کو یقینی بنایا جائے۔

اجلاس کے دوران وزیراعظم کو بجلی کی پیداوار، ترسیل، ڈسکوز اور جینکوز کی نجکاری اور بجلی کے شعبے میں جاری دیگر اصلاحات پر پیش رفت سے آگاہ کیا گیا۔

فورم کو بتایا گیا کہ بجلی کی تقسیم کار تین کمپنیوں اسلام آباد الیکٹرک سپلائی کمپنی (آئیسکو)، فیصل آباد الیکٹرک سپلائی کمپنی (فیسکو) اور گوجرانوالہ الیکٹرک پاور کمپنی (گیپکو) کی نجکاری کے لیے اقدامات جاری ہیں اور جلد ہی اظہارِ دلچسپی جاری کیا جائے گا۔

اجلاس کو آگاہ کیا گیا کہ ترسیلی نظام مضبوط بنانے کے لیے 500 کے وی غازی بروتھا فیصل آباد ٹرانسمیشن لائن کے پی سی ون کی منظوری کے مراحل جاری ہیں۔اسی طرح درآمدی کوئلے سے تھر کوئلے پر بجلی گھروں کی منتقلی کے لیے تکنیکی فزیبلٹی مکمل کر لی گئی ہے، جبکہ تھر کوئلے کی ترسیل کے لیے ریلوے لائن پر کام جاری ہے۔

اجلاس میں مسابقتی بجلی مارکیٹ کے عملی نفاذ کا بھی جائزہ لیا گیا۔ شرکا کو بتایا گیا کہ مسلسل اقدامات کے نتیجے میں لائن لاسز میں گزشتہ سال کے مقابلے میں کمی آئی ہے۔بیٹری انرجی اسٹوریج سسٹم منصوبے کی تصوراتی منظوری دے دی گئی ہے اور اس کی فزیبلٹی اسٹڈی پر کام جاری ہے۔