پرتگال میں طوفان کلاڈیا سے تین افراد ہلاک، برطانیہ میں بھی تباہی

تیز رفتار طوفان کلاؤڈیا نے پرتگال اور برطانیہ میں تباہی مچادی، جس کے نتیجے میں تین افراد ہلاک اور درجنوں زخمی ہوگئے، جبکہ ویلز اور انگلینڈ میں شدید سیلاب کے باعث ریسکیو اداروں کو بڑے پیمانے پر انخلا کی کارروائیاں کرنا پڑیں۔

پرتگال اور اس سے ملحقہ اسپین کے کچھ حصے گزشتہ کئی روز سے طوفانی موسم کی لپیٹ میں ہیں، جہاں طوفان کلاؤڈیا نے شدید بارشوں، تیز ہواؤں اور سیلابی صورتحال کو جنم دیا ہے۔ حکام کے مطابق جمعرات کو لزبن کے قریب فرناوٴ فیرو کے علاقے میں امدادی کارکنوں کو ایک معمر جوڑے کی لاشیں ان کے گھر سے ملی جو رات کے وقت اچانک پانی بھر جانے کے باعث باہر نہ نکل سکے۔

ہفتے کے روز جنوبی پرتگال کے سیاحتی شہر البوفیرا میں طوفان نے تباہی پھیلادی، جس سے کئی گاڑیوں اور کیمپنگ ایریا کو شدید نقصان پہنچا۔ آن لائن جاری فوٹیج میں دیکھا جا سکتا ہے کہ طوفان نے کیمپ سائٹ میں کھڑی رہائشی کیرَوینز کو الٹ کر پھینک دیا۔ حکام کے مطابق اس واقعے میں 85 سالہ برطانوی خاتون ہلاک ہوگئی۔ قریب واقع ایک ہوٹل میں 28 افراد زخمی ہوئے، جن میں سے دو کی حالت تشویشناک ہے۔

پرتگال کے صدر مارسیلو ریبیلو دی سوسا نے واقعے پر افسوس کا اظہار کرتے ہوئے ہلاک ہونے والی خاتون کے اہل خانہ سے تعزیت کی اور زخمیوں کی جلد صحت یابی کی دعا کی۔ موسمیاتی ادارے آئی پی ایم اے نے پورے الگاروی، بیجا اور سیٹوبال کے اضلاع میں ایمرجنسی کی دوسری بلند ترین ’ایمبر الرٹ‘ جاری کردیا ہے۔

دوسری جانب برطانیہ میں طوفان کلاؤڈیا نے ویلز اور انگلینڈ میں بڑے پیمانے پر سیلابی صورتحال پیدا کردی۔ ویلز کے جنوب مشرقی شہر مونو مَتھ میں گھروں، کاروباری مراکز اور شاہراہوں میں پانی بھر گیا۔ ساؤتھ ویلز فائر اینڈ ریسکیو سروس کے مطابق متعدد علاقوں میں ریسکیو، انخلا اور فلاحی کارروائیاں جاری ہیں۔

ویلش حکومت نے کہا کہ طوفان نے راتوں رات آمدورفت اور توانائی کے نظام کو متاثر کیا ہے۔ نیشنل ریسورسز ویلز نے 11 سیلاب وارننگز، جن میں سے چار شدید خطرناک ہیں، جب کہ 17 الرٹس جاری کیے ہیں۔ انگلینڈ میں ماحولیات ایجنسی کے مطابق 49 فعال سیلابی انتباہات اور 134 الرٹس نافذ ہیں۔