ڈپٹی گورنر اسٹیٹ بینک کا جاز کیش ایکسپیرینس لاؤنج کا دورہ

ڈپازٹ پروٹیکشن کارپوریشن (ڈی پی سی) کے چیئرمین اور اسٹیٹ بینک آف پاکستان کے ڈپٹی گورنر ڈاکٹر عنایت حسین نے اسلام آباد میں جاز کیش ایکسپیرینس لاؤنج اور نیٹ ورک آپریشنز سینٹر کا دورہ کیا۔

انہوں نے ڈیجیٹل مالیاتی خدمات کے فروغ، مالی شمولیت کے استحکام اور ملک میں ڈیجیٹل ادائیگیوں کے پھیلاؤ میں جاز کیش کے کردار کو سراہا۔

اس موقع پر جاز کے سی ای او اور موبی لنک مائیکروفنانس بینک کے چیئرمین عامر ابراہیم ، جاز کیش کے سی ای او مرتضیٰ علی اور موبی لنک مائیکروفنانس بینک کے سی ای او حارث محمود چوہدری نے ڈاکٹر عنایت حسین کو جاز کیش کے جاری ڈیجیٹل منصوبوں اور جدید مالیاتی حلوں پر بریفنگ دی۔

ڈپٹی گورنر اسٹیٹ بینک نے کہا کہ ایسے جدید اقدامات ملک میں ڈیجیٹل ادائیگیوں اور مالی شمولیت کو فروغ دیتے ہیں اور پاکستان کے شفاف، کیش لیس معاشی نظام کے وژن کے لیے سرکاری و نجی شعبے کا اشتراک ناگزیر ہے۔

جاز کیش کے سی ای او مرتضیٰ علی نے بتایا کہ جاز کیش ماہانہ 60 ارب روپے سے زائد کی کیو آر ٹرانزیکشنز پراسیس کر رہا ہے اور سات لاکھ سے زائد تاجروں کو بااختیار بنا رہا ہے۔

انہوں نے بتایا کہ نیا بزنس ایپ تاجروں کو ریئل ٹائم کنٹرول فراہم کرتے ہوئے ڈیجیٹل ادائیگیوں کے نظام میں انقلاب لا رہا ہے۔

جاز کیش 5 کروڑ 50 لاکھ سے زائد صارفین اور 6.5 لاکھ سے زیادہ تاجروں کے ساتھ ملک کا سب سے بڑا ڈیجیٹل پیمنٹ نیٹ ورک چلا رہا ہے اور پاکستان کو کیش لیس معیشت کی طرف لے جانے کا اہم حصہ دار ہے۔

کاپی رائٹ بزنس ریکارڈر 2025