فیکٹریاں قائم نہ کرنے پر صنعتی پلاٹس منسوخ کرنے کا اعلان

صوبائی وزیر صنعت و تجارت چوہدری شافع حسین نے کہا ہے کہ صنعتی پلاٹس کو کم کرایوں پر دیا جائے گا ، تاکہ سرمایہ کاری کو فروغ دیا جا سکے۔ لاہور چیمبر آف کامرس اینڈ انڈسٹری کے اجلاس سے خطاب کرتے ہوئے انہوں نے مزید کہاکہ وزیرِاعلیٰ پنجاب کی جانب سے گارمنٹس سٹی کے قیام کا اعلان کیا گیا ہے اور فری زونز میں مشینری کی درآمد پر صفر فیصد ریٹ لاگو کر دیا گیا ہے۔

ایل سی سی آئی کے صدر فہیم الرحمٰن سیگل نے صوبائی وزیر کے بیان کا خیرمقدم کیا جبکہ اس جلاس میں سینئر نائب صدر تنویر احمد شیخ، نائب صدر خرم لوذی، سابق صدور میان انجم نثار، سابق سینئر نائب صدور علی حسام اصغر، ظفر محمود چوہدری اور ایگزیکٹو کمیٹی کے اراکین بھی موجود تھے۔

چوہدری شافع حسین نے کہا کہ دو سال کے دوران صنعتی زونز میں بڑے اصلاحاتی اقدامات کیے گئے، جن میں خاص اقتصادی زونز (ایس ای زیز) کے وہ پلاٹس جو برسوں سے غیر استعمال شدہ تھے، اب منسوخ کیے گئے ہیں۔ اب اگر دو سال کے اندر پیداوار شروع نہیں کی گئی تو پلاٹس منسوخ ہو جائیں گے۔

انہوں نے کہا کہ ایف آئی ای ڈی ایم سی اور دیگر صنعتی علاقوں میں سیکیورٹی، ہاؤسنگ اور بینکاری کی سہولیات بہتر کی جا رہی ہیں۔ ویوو موبائل جلد پاکستان میں مینوفیکچرنگ شروع کرے گا جبکہ فارما، پلاسٹک، فرنیچر اور لیتھیم بیٹریز کے نئے منصوبے بھی زیرِ عمل ہیں۔

صنعتی علاقوں کی توسیع شیخوپورہ، وہاڑی، ملتان، رحیم یار خان، بہاولپور، سیالکوٹ اور دیگر شہروں تک ہو رہی ہے اور سیالکوٹ میں 1400 ایکڑ پر نیا صنعتی اسٹیٹ اور سرجیکل سٹی بھی شروع کیا جائے گا۔

چوہدری شافع حسین نے واضح کیا کہ صنعتی زمین کا غلط استعمال برداشت نہیں کیا جائے گا اور جو سرمایہ کار پانچ سال میں فیکٹریاں قائم نہیں کریں گے، ان کے پلاٹس منسوخ کر دیے جائیں گے۔ صنعتی ترقی حکومت کی اولین ترجیح ہے اور فیصلے کاروباری کمیونٹی سے مشاورت کے بعد کیے جائیں گے۔

کاپی رائٹ بزنس ریکارڈر 2025