بنگلہ دیشی ہائی کمیشن کے وفد کا ایس ای سی پی کا دورہ ، باقاعدہ رابطے قائم کرنے پر اتفاق

بنگلہ دیش ہائی کمیشن کے ایک اعلیٰ سطح وفد نے سیکورٹیز اینڈ ایکسچینج کمیشن آف پاکستان (ایس ای سی پی ) کے ہیڈ کوارٹر کا دورہ کیاتاکہ دونوں ممالک کے ریگولیٹرز کے درمیان باہمی تعاون، علم کے تبادلے اور مستقبل میں باقاعدہ رابطے پر تبادلہ خیال کیا جا سکے۔

وفد کی قیادت بنگلہ دیش کی وزارت خزانہ کے خصوصی معاون (اسٹیٹ منسٹر) ڈاکٹر انیس الزمان چوہدری نے کی اور اس میں پاکستان میں بنگلہ دیش کے ہائی کمشنر ایم ڈی اقبال حسین خان بھی شامل تھے۔

چیئرمین ایس ای سی پی عاکف سعید، کمشنر عبدالرحمن وڑائچ اور دیگر سینئر انتظامیہ کے اراکین نے وفد کا استقبال کیا۔ تبادلہ خیال کا محور دوطرفہ تعلقات کو مضبوط بنانے اور ریگولیٹری تعاون کو بڑھانے کے طریقوں پر رہا۔ دونوں فریقین نے علم کے تبادلے اور مضبوط و لچکدار فنانشل سسٹم کو فروغ دینے کے لیے مشترکہ مہارت سے فائدہ اٹھانے کی اہمیت پر زور دیا۔

انہوں نے باہمی دلچسپی کے منصوبوں پر پیش رفت برقرار رکھنے کے لیے باقاعدہ رابطے قائم کرنے پر اتفاق کیا، جس سے دونوں ممالک کی اقتصادی ترقی میں معاونت ملے گی، ایس ای سی پی کی ٹیم نے پاکستان میں کاروبار کرنے میں آسانی کو بہتر بنانے، مارکیٹ کی شفافیت کو بڑھانے اور سرمایہ کاروں کے تحفظ کو فروغ دینے کے لیے کیے گئےحالیہ ریگولیٹری اصلاحات کا جائزہ پیش کیا۔

ڈاکٹر چوہدری نے ایس ای سی پی کی کوششوں کو سراہا اور فنانشل سیکٹر کے تعاون کو آگے بڑھانے کے لیے بنگلہ دیش کے عزم کو دہرایا۔ یہ ملاقات پاکستان اور بنگلہ دیش کے درمیان اقتصادی اور مالیاتی تعلقات کو گہرا کرنے کے باہمی عہد کےساتھ اختتام پذیر ہوئی۔

کاپی رائٹ بزنس ریکارڈر 2025