ڈالر کی نسبت روپیہ مزید تگڑا

انٹربینک مارکیٹ میں منگل کو بھی ڈالر کی نسبت روپے کی قدر میں بہتری کا سلسلہ جاری رہا۔

کاروبار کے اختتام پر ڈالر کے مقابلے روپیہ ایک پیسے کی معمولی بہتری سے 281.06 روپے پر بند ہوا۔

یاد رہے کہ پیر کو مقامی کرنسی 281.07 پر بند ہوئی تھی۔

عالمی سطح پر، منگل کوجاپانی ین مستحکم رہا کیونکہ جاپان کی پارلیمنٹ میں بعد ازاں ہونے والے ووٹ میں سخت گیر قدامت پسند سانائے تاکائچی کے ملک کی پہلی خاتون وزیرِاعظم منتخب ہونے کے تقریباً یقینی امکانات ہیں۔

ایشیا کے ابتدائی تجارتی سیشن میں زیادہ تر کرنسیاں محدود دائرے میں رہیں، جبکہ امریکی ڈالر میں بھی کوئی نمایاں تبدیلی نہیں دیکھی گئی، کیونکہ امریکی حکومت کے جاری شٹ ڈاؤن کے باعث سرمایہ کار آئندہ ہفتے کے فیڈرل ریزرو اجلاس سے قبل معاشی اعداد و شمار سے بے خبر ہیں۔

گزشتہ سیشن میں معمولی گراوٹ کے بعد منگل کو جاپانی ین امریکی ڈالر کے مقابلے میں 0.1 فیصد مضبوط ہو کر 150.61 کی سطح پر پہنچ گیا۔ سرمایہ کاروں کا خیال ہے کہ دائیں بازو کی اپوزیشن پارٹی ایشین کی حمایت کے بعد سانائے تاکائچی کے ممکنہ وزارتِ عظمیٰ سنبھالنے سے حکومتی اخراجات میں اضافہ ہو سکتا ہے جو جاپان کے مرکزی بینک (بی او جے) کی شرحِ سود بڑھانے کی پالیسی کے بارے میں غیر یقینی صورتحال پیدا کر سکتا ہے۔

دیگر کرنسیوں میں، برطانوی پاؤنڈ 1.3408 امریکی ڈالر پر ٹریڈ کر رہا ہے جبکہ یورو 0.08 فیصد اضافے کے ساتھ 1.1651 ڈالر تک پہنچ گیا، جسے فرانس میں سیاسی غیر یقینی صورتحال میں کمی سے معمولی سہارا ملا۔

امریکی ڈالر انڈیکس میں زیادہ تبدیلی نہیں آئی اور یہ 98.55 پر مستحکم رہا، جبکہ آسٹریلوی ڈالر 0.13 فیصد بڑھ کر 0.6521 ڈالر پر پہنچ گیا۔