بلیو اکانومی کو فروغ دینے کیلئے پہلی میری ٹائم انویسٹمنٹ کانفرنس منعقد کرنے کا اعلان

وفاقی وزیر برائے بحری امور محمد جنید انور چوہدری نے بدھ کے روز پاکستان میری ٹائم انویسٹمنٹ کانفرنس 2025 کے انعقاد کے منصوبے کا اعلان کیا، جس کا مقصد ملک کے بحری شعبے میں سرمایہ کاری کے وسیع مواقع کو اجاگر کرنا ہے۔

وفاقی وزیر نے ایک اعلیٰ سطح اجلاس کی صدارت کرتے ہوئے کہا کہ آئندہ کانفرنس میں تمام بندرگاہوں اور متعلقہ محکموں میں ملکی و غیر ملکی سرمایہ کاروں کے لیے مائیکرو اور میکرو سطح کے سرمایہ کاری کے مواقع پیش کیے جائیں گے۔

وفاقی وزیر نے اس بات پر زور دیا کہ اس اقدام کا مقصد پائیدار سرمایہ کاری کو فروغ دینا ہے تاکہ بلیو اکانومی اور بحری انفراسٹرکچر کو مضبوط بنایا جا سکے۔

اجلاس کے ایجنڈے میں پہلی بار ہونے والی میری ٹائم انویسٹمنٹ کانفرنس کی تاریخ، مقام اور موضوعاتی فوکس کے حوالے سے اہم فیصلے شامل تھے۔ حکام نے اتفاق کیا کہ یہ پروگرام پاکستان کو علاقائی سطح پر بحری سرمایہ کاری اور جدت کے لیے ایک اسٹریٹجک مرکز کے طور پر پیش کرنے کا پلیٹ فارم فراہم کرے گا۔

مباحثے میں ممکنہ سرمایہ کاری کے شعبوں کی نشاندہی پر بھی توجہ دی گئی، جن میں بندرگاہی انفراسٹرکچر، ماہی گیری، بحری نقل و حمل، جہاز سازی اور ساحلی سیاحت شامل ہیں، تاکہ قومی اقتصادی تنوع اور پائیدار ترقی کے اہداف کے ساتھ ہم آہنگی پیدا کی جا سکے۔

اجلاس کا ایک اہم نکتہ کانفرنس کو فروغ دینے اور سرمایہ کاروں، مالیاتی اداروں اور ترقیاتی شراکت داروں کی اعلیٰ سطح کی شرکت کو یقینی بنانے کے لیے اسٹریٹجک میڈیا اور برانڈنگ مہم کے حوالے سے تبادلہ خیال تھا۔

جنید انور چوہدری نے حکام کو ہدایت کی کہ سرمایہ کاری کی تجاویز اور منصوبوں کی پیشکش کے لیے معیاری ٹیمپلیٹس کو حتمی شکل دی جائے تاکہ شعبے میں نئے منصوبوں کی جانچ اور منظوری کے عمل کو ہموار بنایا جا سکے۔

انہوں نے پاکستان کی بحری صلاحیت کو دوبارہ فعال کرنے میں پبلک پرائیویٹ شراکت داری کی اہمیت پر زور دیا اور یقین ظاہر کیا کہ یہ فورم اور کانفرنس ملک کی بحری اوربلیو اکانومی کے اہداف کے فروغ میں ایک اہم سنگِ میل ثابت ہوں گے۔