یو اے ای، پاکستان ریلوے نظام کو اپ گریڈ اور جدید بنانے میں تعاون کرے گا

پاکستان اور متحدہ عرب امارات (یو اے ای) نے پاکستان کے ریل نیٹ ورک کو جدید بنانے اور اپ گریڈیشن کے ذریعے تجارت کو فروغ دینے، رابطے بہتر بنانے اور اس کے نتیجےمیں پائیدار معاشی ترقی کے لیے تعاون بڑھانے پر اتفاق کیا ہے۔

یہ پیش رفت وزیر مملکت برائے خزانہ و ریلوے بلال اظہر کیانی اور یو اے ای کے وزیر توانائی و انفرااسٹرکچر سہیل محمد المزروعی کے درمیان ابوظہبی میں عالمی ریل انفرااسٹرکچر کانفرنس کے موقع پر ہوئی۔

ملاقات میں دونوں ممالک نے بنیادی ڈھانچے کی ترقی اور ریلوے نظام کی جدت پر دوطرفہ تعاون کو بڑھانے پر تبادلہ خیال کیا۔ بلال کیانی نے یو اے ای کی میزبانی کو سراہتے ہوئے اتحاد ریل منصوبے کو علاقائی رابطوں کے لیے ماڈل قرار دیا۔

دونوں فریقین نے پاکستان کے ریل نیٹ ورک کو اپ گریڈ کرنے، تجارتی روابط کو مضبوط بنانے اور پائیدار معاشی ترقی کے لیے تعاون کو فروغ دینے پر زور دیا۔

وزراء نے دوطرفہ تعلقات کی مضبوطی کا بھی اعادہ کیا اور خطے میں ماحولیاتی ذمہ دار نقل و حمل کے حل کو فروغ دینے کا عزم ظاہر کیا۔

یاد رہے ایک روز قبل بلال کیانی نے دبئی میں یو اے ای کے ڈپٹی وزیر کابینہ امور عبد اللہ ناصر لوطہ سے بھی ملاقات کی اور باہمی حکومتی تجربات کے تبادلے پر دستخط شدہ مفاہمت کی یادداشت کے تحت تعاون کو سراہا۔

دونوں جانب سے اب تک ہونے والے تبادلے اور مستقبل کے تعاون کے منصوبوں کا جائزہ بھی لیا گیا۔