وزارتِ داخلہ نے کابینہ کی اقتصادی رابطہ کمیٹی (ای سی سی) سے 32 کروڑ روپے کے ٹیکنیکل سپلیمنٹری گرانٹ (ٹی ایس جی) کی منظوری طلب کی ہے تاکہ سابقہ پاکستان پبلک ورکس ڈپارٹمنٹ (پی ڈبلیو ڈی) کے اُن ملازمین کی تنخواہیں ادا کی جا سکیں جنہیں کیپیٹل ڈویلپمنٹ اتھارٹی (سی ڈی اے) میں منتقل کیا گیا ہے۔
وزارتِ داخلہ کے مطابق، سی ڈی اے نے آگاہ کیا ہے کہ وفاقی کابینہ کے فیصلے کے تحت پاکستان پبلک ورکس ڈپارٹمنٹ کو ختم کرنے کے بعد، وفاقی عمارتوں کی مرمت اور دیکھ بھال کی ذمہ داری سی ڈی اے کو منتقل کر دی گئی ہے۔ چنانچہ ان عمارتوں میں تعینات عملہ بھی سی ڈی اے کے ماتحت کر دیا گیا ہے۔
اس ضمن میں وزارتِ داخلہ و انسدادِ منشیات نے مالی سال 2024-25 کی آخری سہ ماہی کے دوران سی ڈی اے کو 320,091,000 روپے فراہم کیے تھے تاکہ متعلقہ فیلڈ اسٹاف کو اپریل، مئی اور جون 2025 کی تنخواہیں دی جا سکیں۔
وزارتِ داخلہ نے مزید کہا ہے کہ مالی سال 2025-26 کے لیے وفاقی حکومت نے اس مد میں سی ڈی اے کو کوئی فنڈز مختص نہیں کیے۔ نتیجتاً سی ڈی اے ان منتقل شدہ ملازمین کی تنخواہیں اُس وقت تک ادا نہیں کر سکتا جب تک وفاقی حکومت مطلوبہ فنڈز جاری نہ کرے۔ مزید یہ کہ سی ڈی اے ان ملازمین کی تنخواہیں صرف اسی صورت ادا کرے گا جب اسے وفاقی حکومت سے فنڈز موصول ہوں گے، اور یہ فیصلہ بھی وفاقی حکومت پر منحصر ہے کہ ان ملازمین کا مستقبل کس طرح طے کیا جاتا ہے۔
فنانس ڈویژن نے 9 ستمبر 2025 کو اپنے ایک خط میں اس امر سے اتفاق کیا ہے کہ 32 کروڑ 9 لاکھ روپے کی ٹیکنیکل سپلیمنٹری گرانٹ کے اجراء کے لیے سمری ای سی سی کو بھیجی جا سکتی ہے تاکہ سی ڈی اے سابقہ پی ڈبلیو ڈی کے ملازمین کو تنخواہیں ادا کر سکے۔
موجودہ صورت حال کے پیش نظر سی ڈی اے نےڈیمانڈ نمبر . 61-ایف سی 21 ایم 10 کے تحت 320,091,000 روپے کے فنڈز جاری کرنے کی درخواست کی ہے تاکہ جولائی تا ستمبر 2025 کے مہینوں کی تنخواہوں کی بروقت ادائیگی کو یقینی بنایا جا سکے۔
کاپی رائٹ بزنس ریکارڈر، 2025
Comments
Comments are closed.