ڈالر کے مقابلے روپے کی قدر میں مسلسل 30 ویں روز بہتری

انٹربینک مارکیٹ میں جمعرات کو بھی ڈالر کے مقابلے روپے کی قدرمیں بہتری کا سلسلہ جاری رہا۔

کاروبار کے اختتام پر ڈالر کے مقابلے روپیہ 3 پیسے کی بہتری سے 281.47روپے پر بند ہوا۔

واضح رہے کہ یہ مسلسل 30 واں روز ہے جب ڈالر روپے کے مقابلے تنزلی کا شکار رہا۔

یاد رہے کہ بدھ کو مقامی کرنسی 281.50 روپے پر بند ہوئی تھی۔

بین الاقوامی سطح پر امریکی ڈالر جمعرات کی صبح مستحکم رہا۔ اس سے ایک روز قبل ڈالر پہلے ساڑھے تین سال کی کم ترین سطح پر پہنچا اور پھر تیزی سے واپس اوپر گیا کیونکہ سرمایہ کار فیڈرل ریزرو کی آئندہ شرح سود میں کمی سے متعلق محتاط حکمت عملی کو سمجھنے کی کوشش کر رہے تھے۔

نیوزی لینڈ ڈالر اس وقت گر گیا جب اعداد و شمار نے ظاہر کیا کہ ملک کی معیشت دوسری سہ ماہی میں توقع سے کہیں زیادہ سکڑ گئی ہے، جس سے شرح سود میں مزید کمی کے امکانات بڑھے۔ اسی طرح آسٹریلوی ڈالر بھی اس وقت کمزور ہوا جب اگست میں روزگار کی شرح غیر متوقع طور پر گھٹ گئی۔

فیڈ نے بدھ کو پالیسی ریٹ میں ایک چوتھائی فیصد کمی کی اور اشارہ دیا کہ سال کے باقی عرصے میں شرح سود میں مزید کمی کی جائے گی۔ چیئرمین فیڈ جیروم پاول نے اس اقدام کو کمزور لیبر مارکیٹ کے پیش نظر رسک مینجمنٹ کٹ قرار دیا، تاہم کہا کہ جلدی میں شرح سود کم کرنے کی ضرورت نہیں ہے۔

فیصلے کے بعد ڈالر ایک ٹوکری میں شامل دیگر بڑی کرنسیوں کے مقابلے میں فوری طور پر فروری 2022 کے بعد کی کم ترین سطح 96.224 پر آگیا، مگر پھر تیزی سے واپس آ کر دن کے دوران 0.44 فیصد بڑھ کر 97.074 پر پہنچ گیا۔ جمعرات کو یہ معمولی اضافے کے ساتھ 97.095 پر ٹریڈ کر رہا تھا۔

کرنسی کے توازن کے اہم اشاریے کے طور پر تیل کی قیمتیں جمعرات کو تقریباً مستحکم رہیں۔ برینٹ کروڈ فیوچرز 8 سینٹ یا 0.12 فیصد کمی کے ساتھ 67.87 ڈالر فی بیرل اور امریکی ویسٹ ٹیکساس انٹرمیڈیٹ فیوچرز 10 سینٹ یا 0.16 فیصد کمی کے ساتھ 63.95 ڈالر فی بیرل پر موجود تھے۔