پاکستان اور بحرین کا دو طرفہ تعاون کو مزید فروغ دینے کے عزم کا اظہار

وزیرِاعظم شہباز شریف نے بدھ کے روز کہا ہے کہ پاکستان بحرین کے ساتھ تجارت اور سرمایہ کاری کے شعبوں میں تعاون کو وسعت دینے کا خواہاں ہے اور انہوں نے دونوں ممالک کے درمیان گہرے برادرانہ تعلقات کی تجدید کی۔

وہ بحرین کے وزیرِ داخلہ جنرل راشد بن عبداللہ الخلیفہ سے گفتگو کر رہے تھے، جنہوں نے وزیراعظم ہاؤس میں ان سے ملاقات کی۔

وزیرِاعظم نے بحرین کے فرمانروا شاہ حمد بن عیسیٰ الخلیفہ کے لیے نیک تمناؤں کا اظہار کیا اور وزیرِ داخلہ کا خیرمقدم کیا۔

ان کا کہنا تھا کہ بحرین میں قریباً ایک لاکھ بیس ہزار پاکستانی مقیم ہیں جو دونوں ممالک کی ترقی میں کردار ادا کر رہے ہیں۔

وزیراعظم شہباز شریف نے کہا کہ پاکستان بحرینی سرمایہ کاروں اور کاروباری شخصیات کے لیے تیز رفتار ویزا پراسیسنگ سہولت فراہم کر رہا ہے، اور حکومت اسپیشل انویسٹمنٹ فسیلیٹیشن کونسل (ایس آئی ایف سی) کے ذریعے غیر ملکی سرمایہ کاری کو زیادہ سے زیادہ تعاون دینے کی کوششوں میں مصروف ہے۔

انہوں نے بحرینی پولیس اہلکاروں کے لیے نیشنل پولیس اکیڈمی اسلام آباد میں تربیتی مواقع فراہم کرنے کی پیشکش بھی کی۔

بحرین کے وزیرِ داخلہ نے وزیرِاعظم کا پرتپاک استقبال اور مہمان نوازی پر شکریہ ادا کیا۔

اس موقع پر نائب وزیرِاعظم و وزیرِ خارجہ اسحاق ڈار، وزیرِ داخلہ محسن نقوی، وزیرِ مملکت برائے داخلہ طلال چوہدری، وزیراعظم کے معاونِ خصوصی طارق فاطمی اور اعلیٰ حکام بھی موجود تھے۔