آڈیٹر جنرل کی نشاندہی بدعنوانی کی نشاندہی نہیں کرتی، زمین سے متعلق مقدمات پر چیئرمین واپڈا کا مؤقف

سینیٹ کی قائمہ کمیٹی برائے آبی وسائل کے اجلاس میں واپڈا کے نئے چیئرمین لیفٹیننٹ جنرل (ر) محمد سعید نے کہا ہے کہ آڈیٹر جنرل کی نشاندہی لازمی طور پر کسی بدعنوانی کی نشاندہی نہیں کرتی۔ انہوں نے واضح کیا کہ 298 ارب روپے سے زائد کے زیر التواء مقدمات زیادہ تر زمین کے حصول سے متعلق ہیں جبکہ 2.3 ارب روپے کے آڈٹ اعتراضات کرپشن سے منسلک نہیں۔

اجلاس کی صدارت سینیٹر شہادت اعوان نے کی۔ کمیٹی کو بتایا گیا کہ منگلا ڈیم سے متعلق زمینوں کے مقدمات دو دہائیوں سے زیادہ عرصے سے زیر التوا ہیں اور کئی کیسز کے ریکارڈ بھی واپڈا کے پاس موجود نہیں۔ چیئرمین واپڈا نے اعتراف کیا کہ ادارے کے ریکارڈ ابھی تک ڈیجیٹلائز نہیں ہوئے، تاہم اس حوالے سے اقدامات جاری ہیں۔

سیکرٹری آبی وسائل نے کہا کہ کئی متاثرین کو معاوضہ دیا جا چکا ہے لیکن پھر بھی مقدمات دائر کر دیے گئے۔ بعض جگہ زمین لی گئی لیکن ڈیم تعمیر نہ ہوسکا۔ سینیٹر سعدیہ عباسی نے نشاندہی کی کہ کچھ افراد مقدمات دائر کرنے کے بعد غائب بھی ہو جاتے ہیں۔

کمیٹی کو آگاہ کیا گیا کہ نیب میں چھ مقدمات زیر تفتیش ہیں جن میں کچھی کینال اور نائی گاج ڈیم سے متعلق کیسز شامل ہیں۔ سینیٹر شہادت اعوان نے برہمی کا اظہار کرتے ہوئے کہا کہ تین سال سے عدالتوں میں تاریخیں نہیں لگ رہیں اور واپڈا حل کے بجائے شکایات پیش کر رہا ہے۔

انہوں نے نائی گاج ڈیم سے متعلق 30 ارب روپے کے غیرقانونی ٹھیکے کے کیس پر تشویش ظاہر کی اور ہدایت دی کہ تمام آڈٹ کیسز پر ہنگامی اجلاس بلا کر رپورٹ کمیٹی میں پیش کی جائے۔ کمیٹی نے ایف آئی اے اور نیب کو بھی آئندہ اجلاس میں طلب کرنے کا فیصلہ کیا۔

کاپی رائٹ بزنس ریکارڈر، 2025