190 ملین پاؤنڈ کیس کی وصولیوں کیلئے بحریہ ٹاؤن کی 6 جائیدادیں نیلام

قومی احتساب بیورو (نیب) نے جمعرات کو رئیل اسٹیٹ ٹائیکون ملک ریاض سے منسلک جائیدادوں کی نیلامی سے حاصل شدہ رقم کی منتقلی کا عمل شروع کر دیا ہے، جو 2019 میں عدالت سے منظور شدہ پلی بارگین کے تحت رقوم کی وصولی کی کوششوں کا حصہ ہے۔

سرکاری اعلامیے کے مطابق، نیب نے ملک ریاض اور بحریہ ٹاؤن سے وابستہ چھ کمرشل جائیدادوں کی عوامی نیلامی کی۔ یہ اقدام 190 ملین پائونڈ کے سیٹلمنٹ کیس سے منسلک واجب الادا رقم کی وصولی کے لیے کیا گیا ہے، جس کا تعلق بحریہ ٹاؤن کے بانی ملک ریاض سے ہے۔

نیلامی کے لیے پیش کی گئی چھ جائیدادوں میں اسلام آباد میں ایک اور راولپنڈی میں پانچ جائیدادیں شامل ہیں۔

نیب نے بتایا کہ ان جائیدادوں میں بحریہ ٹاؤن فیز ٹو، راولپنڈی میں کارپوریٹ آفس پلاٹ 7-D (تخمینہ قدر 87 کروڑ 10 لاکھ روپے) اور پلاٹ 7-E (تخمینہ قدر 88 کروڑ 10 لاکھ روپے)، اسلام آباد میں روبیش مارکی اور لان (48 کروڑ 80 لاکھ روپے)، ارینا سنیما (1 ارب 10 کروڑ روپے)، بحریہ ٹاؤن انٹرنیشنل اکیڈمی (1 ارب 7 کروڑ روپے) اور سفاری کلب (1 ارب 20 کروڑ روپے) شامل ہیں۔

نیب کے مطابق روبیش مارکی 50 کروڑ 80 لاکھ روپے میں کامیابی سے فروخت ہو گئی — جو ریزرو پرائس سے 2 کروڑ روپے زیادہ ہے — اور اس رقم کی منتقلی کا عمل شروع کر دیا گیا ہے۔

دریں اثنا، دیگر دو جائیدادوں — کارپوریٹ آفس I اور کارپوریٹ آفس II — کے لیے بالترتیب 87 کروڑ 60 لاکھ روپے اور 88 کروڑ 15 لاکھ روپے کی مشروط بولیاں موصول ہوئیں۔

بیورو نے بتایا کہ تین جائیدادیں مطلوبہ معیار کی بولیاں نہ ملنے کے باعث فروخت نہ ہو سکیں۔

جلد دوبارہ نیلامی کا اعلان کیا جائے گا۔

نیب نے اس عزم کا اعادہ کیا کہ عوامی فنڈز کی شفاف وصولی اور احتساب کے قوانین کا سختی سے نفاذ جاری رہے گا۔

کاپی رائٹ بزنس ریکارڈر، 2025