پی سی بی نے حیدر علی کو مانچسٹر میں مجرمانہ تحقیقات کے باعث عبوری طور پر معطل کر دیا

پاکستان کرکٹ بورڈ (پی سی بی) نے کرکٹر حیدر علی کو برطانیہ میں گریٹر مانچسٹر پولیس کی جانب سے جاری مجرمانہ تحقیقات کی تصدیق کے بعد عبوری طور پر معطل کر دیا ہے۔

پی سی بی کی جانب سے جمعرات کو جاری کردہ بیان میں کہا گیا ہے کہ یہ تحقیقات پاکستان شاہینز کی حالیہ انگلینڈ ٹور کے دوران پیش آنے والے ایک مبینہ واقعے سے متعلق ہیں۔

بیان میں کہا گیا ہے کہ تمام کھلاڑیوں کی فلاح و بہبود اور قانونی حقوق کو یقینی بنانے کی اپنی ذمہ داری کے تحت، پی سی بی نے یہ امر یقینی بنایا ہے کہ حیدر علی کو اس پورے عمل کے دوران مناسب قانونی معاونت فراہم کی گئی ہے تاکہ ان کے حقوق کا تحفظ کیا جا سکے۔

پی سی بی نے مزید کہا ہے کہ وہ برطانیہ کے قانونی طریقہ کار کا مکمل احترام کرتا ہے اور یہ ضروری سمجھتا ہے کہ تحقیقات بغیر کسی مداخلت کے آگے بڑھیں۔ اسی باعث، حیدر علی کو فوری طور پر عبوری معطلی کا سامنا کرنا پڑا ہے۔

بورڈ نے واضح کیا ہے کہ جب قانونی کارروائی مکمل ہو جائے گی اور تمام حقائق سامنے آ جائیں گے، تب وہ اپنے کوڈ آف کنڈکٹ کے تحت مزید کارروائی کا اختیار محفوظ رکھتا ہے۔

پی سی بی نے کہا ہے کہ وہ قانونی عمل کے مکمل ہونے تک اس معاملے پر مزید کوئی تبصرہ نہیں کرے گا۔

یاد رہے کہ 24 سالہ حیدر علی ایک ٹاپ آرڈر بیٹر ہیں، جو پاکستان کی جانب سے بین الاقوامی سطح پر نمائندگی کر چکے ہیں اور حالیہ موسم گرما میں پاکستان شاہینز کے انگلینڈ ٹور کا بھی حصہ تھے۔