گیس لوڈشیڈنگ پر وزیراعظم کا نوٹس، اضافی طلب پورا کرنے کا انتظام کررہے ہیں ، سوئی سدرن

سوئی سدرن گیس کمپنی (ایس ایس جی سی) نے رمضان المبارک کے دوران برھتی ہوئی طلب کو پورا کرنے کے لیے اضافی گیس کا انتظام کرنے کی یقین دہانی کرائی ہے۔

ایس ایس جی سی کی جانب سے یہ اعلان وزیراعظم شہباز شریف کی جانب سے سحری اور افطار کے دوران گیس کی فراہمی میں تعطل کا نوٹس لینے کے بعد کیا گیا۔

یاد رہے کہ اتوار کو وزیراعظم شہباز شریف نے سوئی کمپنیوں کے منیجنگ ڈائریکٹرز اور سینئر مینجمنٹ کے ساتھ سیکریٹری اور وزیر سطح پر ہنگامی اجلاس کی صدارت کی تھی۔

وزیراعظم کی ہدایات کے بعد کمپنی نے فوری طور پر گیس پریشر میں دس فیصد اضافے کا فیصلہ کیا ہے۔

کمپنی نے سحری اور افطار کے اوقات سے 30 سے 45 منٹ قبل گیس ڈسٹری بیوشن سینٹرز کھولنے کا بھی اعلان کیا ہے تاکہ نیٹ ورک کی کم گنجائش والے علاقوں میں سسٹم پریشر کو بہتر بنایا جاسکے۔

ایس ایس جی سی نے کہا کہ ٹرانسمیشن لائن پیک کو بڑھانے اور طلب کو پورا کرنے کیلئے اضافی 20 ایم ایم سی ایف ڈی گیس کا انتظام کیا جائیگا۔

کمپنی نے مزید کہا کہ وہ ہیڈ آفس اور ریجنل دفاتر میں کنٹرول روم قائم کررہی ہے تاکہ روزانہ کی بنیاد پر گیس کی فراہمی اور نیٹ ورک کی صورتحال کی نگرانی کی جا سکے۔

دریں اثنا کمشنر کراچی سید حسن نقوی نے کے الیکٹرک اور ایس ایس جی سی کو رمضان المبارک کے دوران سحری اور افطار کے اوقات میں بلاتعطل بجلی اور گیس کی فراہمی کو یقینی بنانے کی ہدایت کی۔

اسسٹنٹ کمشنر ہیڈکوارٹرز رابعہ سید کی جانب سے سوئی سدرن کے منیجنگ ڈائریکٹر اور کے الیکٹرک کے چیف ایگزیکٹو آفیسر کو لکھے گئے خط میں رمضان المبارک کے دوران مسلسل یوٹیلیٹی سپلائی کی اہمیت پر زور دیا گیا۔

خط میں کہا گیا ہے کہ یہ دیکھا گیا ہے کہ ان اوقات میں لوڈ شیڈنگ سے عوام کو کافی پریشانی ہوتی ہے۔

یاد رہے کہ 6 فروری کو بھی ایس ایس جی سی نے ایک نوٹیفکیشن میں عوام کو سحر اور افطار کی تیاریوں کے لئے بلاتعطل گیس کی فراہمی کی یقین دہانی کرائی تھی۔

تاہم یہ بات ذہن میں رکھنی چاہیے کہ ملک کے گیس ذخائر میں سالانہ 10 فیصد کمی کی وجہ سے گیس کی طلب اور رسد کا فرق بڑھ رہا ہے۔

ایس ایس جی سی کی جانب سے گیس کی فراہمی کا شیڈول جاری کردیا گیا ہے۔

گیس کی دستیابی کا وقت

صبح 03:00 بجے سے صبح 09:00 بجے تک

شام 03:30 بجے سے رات 10:00 بجے تک

گیس کی بندش کا وقت

صبح 09:00 بجے سے شام 03:30 بجے تک

رات 10:00 بجے سے صبح 03:00 بجے تک