اٹارنی جنرل نے عدالتی امور میں اداروں کی مداخلت کا الزام مسترد کردیا

پاکستان کے اٹارنی جنرل منصور نے عدالتی امور میں حکومت یا کسی ریاستی ادارے کی جانب سے مداخلت کا الزام مسترد کردیا ہے۔

منگل کو وفاقی دارالحکومت اسلام آباد میں پریس کانفرنس کرتے ہوئے انہوں نے کہا کہ ججز کے حالیہ خط سے یہ تاثر پیدا ہوا ہے کہ عدالتی معاملات میں مداخلت کی جا رہی ہے۔

اٹارنی جنرل نے کہا کہ جہاں تک مجھے معلوم ہے سیکورٹی اسٹیبلشمنٹ کے کسی افسر نے کسی جج سے براہ راست رابطہ کیا اور نہ ہی عدالتی امور میں مداخلت کی۔

انہوں نے کہا کہ اٹارنی جنرل کے دفتر کے ذریعے رابطہ موضوع کی نزات کی وجہ سے کیا گیا تھا جس میں سیکورٹی کے مسائل شامل تھے۔

مارچ میں جسٹس محسن اختر کیانی، جسٹس طارق محمود جہانگیری، جسٹس بابر ستار، جسٹس سردار اعجاز اسحاق خان، جسٹس ارباب محمد طاہر، اور جسٹس سمن رفعت امتیاز سمیت اسلام آباد ہائی کورٹ کے ججوں نے سپریم جوڈیشل کونسل (ایس جے سی) کو ایک خط لکھ کر عدالتی امور میں انٹیلیجنس اداروں کی مداخلت پر رہنمائی طلب کی تھی۔

بعد ازاں سپریم کورٹ نے لاہور اسلام آباد ہائیکورٹ کی جانب سے عدالتی امور میں خفیہ ایجنسیوں کی مداخلت اور دھمکیوں سے متعلق خط پر ازخود نوٹس لیا تھا۔

اس معاملے پر بات کرنے کے لیے لاہور ہائی کورٹ اور اسلام آباد ہائیکورٹ نے اپنی اپنی عدالتوں میں فل کورٹ میٹنگز بھی کیں۔ اسلام آباد کے ججز نے متفقہ طور پر فیصلہ کیا کہ مستقبل میں ان کے عدالتی امور میں اس طرح کی مداخلت کی صورت میں ادارہ جاتی ردعمل دیا جائے گا۔

اٹارنی جنرل کی پریس کانفرنس کے مطابق پاکستان کو گزشتہ 45 سالوں سے ایسے مسائل کا سامنا ہے جس کے حل کیلئے مختلف اداروں کے درمیان رابطے کی ضرورت ہے۔

انہوں نے خط پر حکومتی موقف کی وضاحت کرتے ہوئے کہا کہ ہم نے عدلیہ سے کہا ہے کہ نگرانی سے متعلق بریفنگ ان کیمرہ کی جائے۔

انہوں نے زور دے کر کہا کہ اسے عدالتی کارروائی میں مداخلت نہیں سمجھا جا سکتا۔

انہوں نے واضح کیا کہ ریاستوں کے پاس کچھ حساس مسائل ہیں جو عوامی بحث کے لیے مناسب نہیں ہیں۔

اٹارنی جنرل نے یہ بھی کہا کہ میں نہیں سمجھتا کہ حکومت یا کوئی ادارہ عدلیہ کے آئینی کام میں مداخلت کر سکتا ہے۔

انہوں نے مزید کہا کہ میں چاہوں گا کہ میڈیا اس خط کی جانچ کرے جو سوشل میڈیا پر دستیاب ہے تاکہ اس بات کا تعین کیا جا سکے کہ عدالتی عمل میں کیا رکاوٹ ہے۔