میلانیا ٹرمپ وائٹ ہاؤس میں یوکرین اور روس کے ’نمائندوں‘ کی میزبانی کریں گی

امریکی خاتونِ اول میلانیا ٹرمپ آئندہ ہفتے وائٹ ہاؤس میں یوکرین اور روس کے نمائندوں کی میزبانی کریں گی، جہاں بچوں کی فلاح و بہبود اور تنازع کے دوران اپنے خاندانوں سے بچھڑ جانے والے بچوں کی واپسی سے متعلق امور پر بات چیت ہوگی۔

وائٹ ہاؤس کے مطابق اس ملاقات کا مقصد دونوں ملکوں کے درمیان انسانی بنیادوں پر رابطوں کو فروغ دینا ہے، خصوصاً ان بچوں کی واپسی کے معاملے پر جو روس اور یوکرین کے درمیان جنگ کے باعث اپنے خاندانوں سے جدا ہو گئے ہیں۔

میلانیا ٹرمپ نے اس معاملے پر پہلے بھی آواز اٹھائی ہے اور روسی صدر ولادیمیر پیوٹن کو ایک خط بھی ارسال کیا تھا، جس میں جنگ کے دوران متاثر ہونے والے بچوں کے تحفظ اور ان کی بحفاظت واپسی کی ضرورت پر زور دیا گیا تھا۔

امریکی خاتونِ اول کا کہنا ہے کہ بچوں کو جنگ کے اثرات سے محفوظ رکھنا اور انہیں اپنے خاندانوں سے دوبارہ ملانے کی کوششیں جاری رہنی چاہئیں۔