پاکستان اور آئی ایم ایف کے درمیان اسٹاف لیول معاہدہ طے پاگیا

آئی ایم ایف اور پاکستان کے درمیان 7 ارب ڈالر کے توسیعی فنڈ سہولت (ای ایف ایف) پروگرام کے چوتھے جائزے اور لچک و پائیداری سہولت (آر ایس ایف) کے تیسرے جائزے پر اسٹاف لیول معاہدہ طے پا گیا ہے، جبکہ 2026 کے آرٹیکل IV کے تحت مشاورت بھی مکمل کرلی گئی ہے۔

آئی ایم ایف کی ٹیم نے آئیوا پیٹرووا کی قیادت میں 23 ستمبر سے 7 اکتوبر تک کراچی اور اسلام آباد میں پاکستانی حکام کے ساتھ مذاکرات کیے۔ معاہدے کی آئی ایم ایف ایگزیکٹو بورڈ سے منظوری ضروری ہے۔ منظوری کے بعد پاکستان کو ای ایف ایف کے تحت تقریباً ایک ارب ڈالر جبکہ آر ایس ایف کے تحت تقریباً 21 کروڑ ڈالر دستیاب ہوں گے، جس کے بعد دونوں پروگراموں کے تحت مجموعی ادائیگیاں تقریباً 5.7 ارب ڈالر ہوجائیں گی۔

آئی ایم ایف کے مطابق ای ایف ایف پروگرام کے تحت پاکستان نے مشرق وسطیٰ کے تنازع کے اثرات سے کامیابی سے نمٹا ہے اور مضبوط پالیسیوں کے باعث معاشی استحکام برقرار رہا۔ مالی سال 2026 کی پہلی تین سہ ماہیوں میں حقیقی مجموعی ملکی پیداوار کی شرح نمو 4 فیصد رہی، تاہم توانائی کی بلند قیمتوں اور رسد میں رکاوٹوں کے باعث سالانہ شرح نمو 3.6 فیصد رہنے کا تخمینہ ہے۔ مئی میں بلند ترین سطح پر پہنچنے کے بعد مہنگائی ستمبر میں کم ہوکر تقریباً 10.3 فیصد رہی، جبکہ بنیادی مہنگائی بھی قابو میں رہی۔

آئی ایم ایف نے کہا کہ مضبوط ترسیلات زر کی مدد سے مالی سال 2026 میں کرنٹ اکاؤنٹ بڑی حد تک متوازن رہا جبکہ ستمبر کے اختتام تک زرمبادلہ کے مجموعی ذخائر تقریباً 21.5 ارب ڈالر ہوگئے۔ تاہم جغرافیائی سیاسی کشیدگی، توانائی کی قیمتوں میں اتار چڑھاؤ، عالمی مالیاتی حالات میں سختی اور تجارتی رکاوٹوں کے باعث خطرات بدستور موجود ہیں۔

آئی ایم ایف نے مالی سال 2027 کے بجٹ پر مؤثر عملدرآمد، جی ڈی پی کے 2 فیصد کے بنیادی پرائمری سرپلس کے حصول اور ٹیکس اصلاحات کو اہم قرار دیا۔ ٹیکس وصولیوں کے اہداف کے تحفظ کے لیے خطرات کی بنیاد پر آڈٹ، ڈیجیٹل انوائسنگ اور تیسرے فریق کے ڈیٹا کے استعمال سمیت اصلاحات پر زور دیا گیا۔

صحت اور تعلیم کے اخراجات مالی سال 2024 کے 2.2 فیصد سے بڑھ کر مالی سال 2026 میں جی ڈی پی کے 2.5 فیصد ہوگئے ہیں، جنہیں مالی سال 2027 میں 2.8 فیصد تک بڑھانے کا عزم ظاہر کیا گیا ہے۔ آئی ایم ایف نے کم آمدنی والے طبقات کے لیے نقد امداد بڑھانے کی حمایت کرتے ہوئے وسیع البنیاد ایندھن معاونتی اسکیم کو فوری طور پر مرحلہ وار ختم کرنے پر بھی زور دیا۔

مرکزی بینک کے حوالے سے آئی ایم ایف نے کہا کہ مہنگائی کو اسٹیٹ بینک کے ہدف کی حدود میں مستقل طور پر لانے کے لیے مناسب حد تک سخت زری پالیسی برقرار رکھی جائے، جبکہ شرح مبادلہ میں لچک کو معاشی جھٹکوں سے نمٹنے کے لیے اہم ذریعہ برقرار رکھا جائے۔

آئی ایم ایف نے توانائی کے شعبے میں بروقت ٹیرف ایڈجسٹمنٹ، بجلی کی تقسیم کار کمپنیوں کی کارکردگی بہتر بنانے، نجی شعبے کی شمولیت بڑھانے، بجلی کی مارکیٹ میں مسابقت، گیس شعبے میں لاگت کی وصولی اور گیس کے نقصانات میں کمی کو بھی ترجیحات میں شامل کیا۔

2026 کی آرٹیکل IV مشاورت میں معیشت کو زیادہ قدر رکھنے والی سرگرمیوں کی جانب منتقل کرنے، مسابقت بڑھانے، ریگولیٹری و تجارتی رکاوٹیں کم کرنے، نجکاری آگے بڑھانے، سرکاری اداروں کے نظم و نسق اور شفافیت بہتر بنانے اور گورننس و انسداد بدعنوانی کے اداروں کو مضبوط کرنے پر زور دیا گیا۔

آئی ایم ایف کے مطابق آر ایس ایف کے تحت موسمیاتی تبدیلیوں کے اثرات سے نمٹنے کے لیے بھی اصلاحات جاری ہیں، جن میں عوامی سرمایہ کاری کی منصوبہ بندی میں موسمیاتی عوامل کو شامل کرنا، قدرتی آفات کے مالیاتی انتظام، آبپاشی کے پانی کی قیمتوں اور وصولیوں میں بہتری، بجلی کی سبسڈی کو زیادہ ہدفی بنانا، توانائی کی بچت کے معیارات اور ٹرانسپورٹ کے شعبے سے کاربن اخراج میں کمی شامل ہیں۔

دریں اثنا، ای ایف ایف کے چوتھے اور آر ایس ایف کے تیسرے جائزے کے اختتام پر آئی ایم ایف مشن چیف آئیوا پیٹرووا نے وفاقی وزیر خزانہ و محصولات سینیٹر محمد اورنگزیب سے اسلام آباد میں وزارت خزانہ میں ملاقات کی۔ سرکاری بیان کے مطابق سیکریٹری خزانہ امداد اللہ بوسال اور آئی ایم ایف کے پاکستان میں نمائندے ماہیر بنیشی بھی اس موقع پر موجود تھے۔