شمالی کوریا کا نیا میزائل تجربہ، دشمن کو ناقابل علاج دردِ سر دینے کی صلاحیت کا دعویٰ

شمالی کوریا نے اتوار کو انتہائی جدید دفاعی ٹیکنالوجی کے حامل ایک نئے ہتھیار کا کامیاب تجربہ کیا، جس کی نگرانی ملک کے رہنما کم جونگ ان نے کی۔ سرکاری میڈیا نے منگل کو بتایا کہ کم جونگ ان نے ملک کی جنگی تیاریوں کو مضبوط بنانے میں پیش رفت کو سراہا۔

کم جونگ ان نے کہا کہ شمالی کوریا کی میزائل انتظامیہ کی جانب سے کیا گیا تجربہ مسلح افواج کی جنگی صلاحیت میں نمایاں پیش رفت کو ظاہر کرتا ہے۔ ان کے بقول دشمن اس پیش رفت کے معنی بغیر کسی وضاحت کے بہتر طور پر سمجھ جائے گا۔

سرکاری خبر رساں ایجنسی کے سی این اے نے ہتھیار کی نوعیت واضح نہیں کی۔ جاری کی گئی تصاویر میں کم جونگ ان کو اپنی نوعمر بیٹی کے ہمراہ ایک اسکرین کا جائزہ لیتے دکھایا گیا، جس پر ملک کے مشرقی ساحل کا نقشہ اور پرواز کا راستہ دکھایا گیا تھا۔

سیول میں قائم شمالی کوریا سے متعلق ویب سائٹ این کے نیوز کے مطابق یہ میزائل ہائپرسونک گلائیڈ وہیکل سے لیس کسی میزائل کا جدید ورژن معلوم ہوتا ہے۔ ایسے ہتھیار میزائل شکن دفاع سے بچنے کے لیے وار ہیڈ کو راستے میں موو کرنے کی صلاحیت دے سکتے ہیں۔

جنوبی کوریا کی فوج نے کہا کہ شمالی کوریا نے اتوار کو اپنے مشرقی ساحل سے دو مختصر فاصلے تک مار کرنے والے بیلسٹک میزائل فائر کیے۔

یہ تجربہ ایسے وقت ہوا جب پیانگ یانگ نے امریکا پر فوجی مشقوں کے ذریعے جزیرہ نما کوریا میں کشیدگی بڑھانے کا الزام عائد کیا تھا۔ پیر کو جنوبی کوریا، جاپان اور امریکا کے وزرائے خارجہ نے نیویارک میں اقوام متحدہ کی جنرل اسمبلی کے موقع پر ملاقات کی اور جزیرہ نما کوریا میں امن، استحکام اور جوہری تخفیف کے لیے قریبی رابطہ کاری پر اتفاق کیا۔