بینک آف پنجاب کو بحرین میں نئے یونٹ کے قیام کی منظوری مل گئی

بینک آف پنجاب کو بحرین میں اوورسیز ہول سیل بینکنگ یونٹ قائم کرنے کے لیے اسٹیٹ بینک آف پاکستان سے منظوری مل گئی ہے جو بینک کے بین الاقوامی دائرہ کار کو وسعت دینے کے منصوبوں میں ایک اہم پیش رفت ہے۔

لسٹڈ بینک نے جمعرات کو پاکستان اسٹاک ایکسچینج کو جاری کردہ نوٹس میں اس پیش رفت سے آگاہ کیا۔

نوٹس میں کہا گیا کہ ہم آپ کو مطلع کرنا چاہتے ہیں کہ اسٹیٹ بینک نے 5 اگست 2026 کے خط کے ذریعے بینک کو مملکتِ بحرین میں اوورسیز ہول سیل بینکنگ یونٹ قائم کرنے کی اصولی منظوری دے دی ہے، تاہم یہ منظوری پاکستان اور بحرین کے متعلقہ ریگولیٹری حکام سے تمام مطلوبہ منظوریوں کے حصول، متعلقہ قوانین، قواعد و ضوابط کی پابندی اور اسٹیٹ بینک کی جانب سے عائد کردہ شرائط کی تکمیل سے مشروط ہے۔

2024 میں بینک آف پنجاب کو اپنے بورڈ آف ڈائریکٹرز سےبحرین میں ہول سیل بینکنگ یونٹ اور متحدہ عرب امارات میں نمائندہ دفتر قائم کرنے کی منظوری مل گئی تھی۔

بینک آف پنجاب نے جمعرات کو جاری کردہ نوٹس میں کہا کہ بحرین میں مجوزہ اوورسیز ہول سیل بینکنگ یونٹ تمام مطلوبہ ریگولیٹری منظوریوں کے حصول کے بعد ہی کام شروع کرے گا جن میں سینٹرل بینک آف بحرین سے این او سی اور اسٹیٹ بینک آف پاکستان کی جانب سے مطلوبہ بینکاری لائسنس کا اجرا بھی شامل ہے۔

ہول سیل بینکنگ سے مراد بڑے صارفین کو مالیاتی خدمات فراہم کرنا ہے جن میں دیگر بینک، مالیاتی ادارے، سرکاری ایجنسیاں، بڑی کارپوریشنز اور رئیل اسٹیٹ ڈویلپرز شامل ہیں۔