اسٹاک ایکسچینج میں اتار چڑھاؤ، 100 انڈیکس 1000 سے زائد پوائنٹس گرگیا

پاکستان اسٹاک ایکسچینج (پی ایس ایکس) میں جمعرات کو کاروبار کے دوران شدید اتار چڑھاؤ دیکھنے میں آیا جہاں ٹریڈنگ کے دوران بینچ مارک کے ایس ای 100 انڈیکس میں 1000 سے زائد پوائنٹس کی کمی ریکارڈ کی گئی۔

صبح 11:35 بجے تک بینچ مارک انڈیکس 1,049.15 پوائنٹس یا 0.60 فیصد کی کمی سے 174,993.83 پوائنٹس پر آگیا۔

فروخت کا دباؤ آٹوموبائل اسمبلرز، سیمنٹ، کھاد، تیل و گیس کی تلاش کرنے والی کمپنیوں ، آئل مارکیٹنگ کمپنیوں، بجلی پیدا کرنے والی کمپنیوں اور ریفائنری کے شعبوں میں دیکھا گیا۔ اٹک ریفائنری، پاکستان ریفائنری ، حب پاور ، آئل اینڈ گیس ڈیولپمنٹ کمپنی ، پاکستان آئل فیلڈز ، پاکستان پیٹرولیم ، پاکستان اسٹیٹ آئل ، ایم سی بی بینک ، نیشنل بینک اور یونائیٹڈ بینک بھی منفی زون میں دکھائی دیے۔

یاد رہے کہ بدھ کو اسٹاک ایکسچینج مسلسل دوسرے روز بھی دباؤ کا شکار رہی کیونکہ مشرقِ وسطیٰ میں بڑھتی ہوئی جغرافیائی سیاسی کشیدگی اور عالمی منڈی میں خام تیل کی قیمتوں میں تیز اضافے نے سرمایہ کاروں کے اعتماد کو متاثر کیا جس کے نتیجے میں اہم شعبوں میں وسیع پیمانے پر فروخت کا رجحان دیکھنے میں آیا۔

بدھ کو بینچ مارک کے ایس ای 100 انڈیکس 1,580.90 پوائنٹس یا 0.89 فیصد کی کمی سے 176,042.99 پوائنٹس پر بند ہوا۔

عالمی سطح پر جمعرات کو ایشیائی اسٹاک مارکیٹیں واضح سمت اختیار نہ کرسکیں اور اے آئی سے متعلق سرمایہ کاری پر بڑھتی ہوئی سرمایہ کار بے چینی کے باعث ہفتے بھر کی بھاری گراوٹ کے دباؤ میں رہیں۔ دوسری جانب امریکی فیڈرل ریزرو نے اندرونی اختلافِ رائے کے باوجود شرحِ سود برقرار رکھی جس کے بعد بانڈ مارکیٹوں میں آئندہ شرحِ سود کی سمت کے حوالے سے غیر یقینی صورتحال برقرار رہی۔

برینٹ خام تیل کے فیوچرز 90 ڈالر فی بیرل سے نیچے آگئے حالانکہ ایک روز قبل مشرقِ وسطیٰ میں لڑائی شدت اختیار کرنے کے باعث ان میں 7 فیصد سے زائد اضافہ ہوا تھا۔ تاہم اعدادوشمار سے ظاہر ہوا کہ مسلسل میزائل اور ڈرون حملوں کے باوجود آئل ٹینکر بدستور خطے سے روانہ ہورہے ہیں۔

امریکی مرکزی بینک کی جانب سے شرحِ سود برقرار رکھنے کے فیصلے کے بعد امریکی ڈالر دباؤ کا شکار رہا تاہم پالیسی سازوں کی منقسم رائے نے سرمایہ کاروں کو اس بارے میں غیر یقینی صورتحال سے دوچار کر دیا کہ آیا فیڈ مہنگائی پر قابو پانے کے لیے مستقبل میں شرحِ سود میں مزید اضافہ کرے گا یا نہیں۔ دوسری جانب طویل مدت کے امریکی ٹریژری بانڈز ییلڈ بڑھ کر گزشتہ 19 برس کی بلند ترین سطح پر پہنچ گئی۔

ایشیائی چِپ ساز کمپنیاں رواں ہفتے سرمایہ کاروں کی توجہ کا مرکزرہیں کیونکہ جنوبی کوریا کی اسٹاک مارکیٹ میں شدید فروخت کے باعث ملکی ایکویٹی مارکیٹ کی مالیت میں 2 کھرب ڈالر سے زائد کی کمی واقع ہوئی جس نے عالمی مالیاتی منڈیوں کو ہلا کر رکھ دیا۔ اس کے ساتھ ہی سرمایہ کار اے آئی پر ہونے والے بھاری اخراجات سے حاصل ہونے والے ممکنہ منافع کے بارے میں بھی تشویش کا شکار رہے۔

جنوبی کوریا کا کوسپی انڈیکس جمعرات کو غیر یقینی کاروبار کے دوران 4 فیصد بڑھ گیا تاہم ہفتہ وار بنیاد پر اس میں تقریباً 12 فیصد کمی کا خدشہ برقرار ہے۔ اس صورتحال پر وزیرِ خزانہ کو یون چیول نے سنگل اسٹاک لیوریجڈ ای ٹی ایف متعارف کرانے پر معذرت بھی کی۔

ادھر جاپان کے علاوہ ایشیا پیسیفک خطے کے حصص پر مشتمل ایم ایس سی آئی کا وسیع ترین انڈیکس ابتدائی کاروبار میں 1 فیصد سے زائد بڑھ گیا جبکہ جاپان کا نکی انڈیکس 2 فیصد اضافے کے ساتھ ٹریڈ کرتا رہا تاہم ہفتہ وار بنیاد پر اس میں تقریباً 3 فیصد کمی کا امکان ہے۔

یہ انٹرا ڈے اپڈیٹ ہے