ایرانی حملوں میں کویت کا بجلی گھر اور تیل کی تنصیب نشانہ بن گئی

کویت نے ہفتہ کو الزام عائد کیا کہ ایران نے ایک بجلی و پانی پیدا کرنے والے پلانٹ اور ایک تیل کی تنصیب کو نشانہ بنایا، جسے اس نے مشرقِ وسطیٰ میں جاری جنگ کے دوران شہری بنیادی ڈھانچے پر حملہ قرار دیا۔

یہ حملہ ایسے وقت میں ہوا جب امریکا نے مسلسل ساتویں رات بھی ایران کے اہداف پر حملے کیے، جس کے جواب میں تہران نے خلیج میں امریکا کے اتحادی ممالک کو نشانہ بنایا۔

کویت کی وزارتِ بجلی و پانی نے ایک بیان میں کہا، ”دشمن کے ایک اور حملے میں بجلی اور پانی صاف کرنے والے پلانٹ کو نشانہ بنایا گیا، جس کے نتیجے میں پلانٹ کے ایک حصے میں آگ بھڑک اٹھی۔“

کویت کی وزارتِ بجلی و پانی نے بتایا کہ حملے کے باعث بجلی پیدا کرنے والے کئی یونٹس کو بند کرنا پڑا۔

دو روز کے دوران کویت کے بجلی اور پانی پیدا کرنے والے پلانٹ پر یہ دوسرا حملہ تھا۔ ایک روز قبل جمعہ کو بھی ایسے ہی حملے میں آگ بھڑک اٹھی تھی اور پلانٹ کو نقصان پہنچا تھا۔

کویت کے محکمۂ فائر بریگیڈ کے مطابق ہفتے کے حملوں کے نتیجے میں دو مختلف مقامات پر آگ لگ گئی، جس سے کئی فائر فائٹرز اور ایک کارکن زخمی ہوگیا۔

وزارتِ خارجہ نے اپنے بیان میں کہا، ”ان اہم تنصیبات کو بار بار نشانہ بنانا اس بات کا ثبوت ہے کہ شہری مقامات اور بنیادی ڈھانچے کو منظم انداز میں ہدف بنایا جا رہا ہے، جس سے شہریوں کی جان و مال کو شدید خطرات لاحق ہیں۔“

دوسری جانب کویت کی سرکاری آئل کمپنی نے بتایا کہ تیل کی تنصیب پر حملے میں متعدد افراد زخمی ہوئے اور ”نمایاں مالی نقصان“ ہوا۔ سرکاری خبر رساں ایجنسی کونا کے مطابق احتیاطاً اس مقام کو خالی کرا لیا گیا۔

کویت میں مقیم ایک شہری نے اے ایف پی کو بتایا کہ اگر کشیدگی برقرار رہی تو بنیادی اشیائے ضروریہ کی قلت کا خدشہ پیدا ہو سکتا ہے۔

لبنانی نژاد 61 سالہ حسن ریان، جو کویت میں میڈیا سے وابستہ ہیں، نے کہا، ”آج صبح سے پانی اور ڈبہ بند خوراک کی طلب بڑھ گئی ہے کیونکہ لوگوں کو خدشہ ہے کہ خدمات اور سپلائی چین متاثر ہو سکتی ہے۔“

کویت کی قومی فضائی کمپنی نے بھی اعلان کیا کہ راکٹ اور ڈرون حملوں کے باعث کویت انٹرنیشنل ایئرپورٹ پر فضائی آپریشن عارضی طور پر معطل کر دیا گیا، جس کے نتیجے میں بیشتر پروازوں کا شیڈول تبدیل کرنا پڑا۔

ادھر ایران نے حالیہ دنوں میں کویت اور بحرین پر حملے تیز کر دیے ہیں، جہاں امریکا کی اہم فوجی تنصیبات موجود ہیں۔

بحرین کی فوج نے کہا کہ ہفتے کو اس کے فضائی دفاعی نظام نے ”ایران کے غدارانہ فضائی حملوں“ کی ایک لہر کو ناکام بنا دیا۔ دارالحکومت منامہ میں موجود اے ایف پی کے نمائندے کے مطابق خطرے کے سائرن بجنے کے بعد دھماکوں کی آوازیں سنی گئیں۔

بحرین کی وزارتِ داخلہ نے بتایا کہ صبح سے اب تک پانچ مرتبہ فضائی حملے کے سائرن بجائے گئے اور شہریوں کو محفوظ مقامات پر منتقل ہونے کی ہدایت کی گئی۔

اس سے قبل ایرانی فوج نے سرکاری نشریاتی ادارے کے ذریعے دعویٰ کیا تھا کہ اس نے امریکی حملوں کے جواب میں بحرین میں امریکا کے زیرِ استعمال ایک فضائی اڈے کو نشانہ بنایا ہے۔

ایرانی فوج کے مطابق ڈرون حملوں میں شیخ عیسیٰ ایئر بیس پر امریکی فوج کے طیاروں کی پناہ گاہیں، پارکنگ ایریاز، ایندھن ذخیرہ کرنے والے ٹینک اور بحرین میں کئی رابطہ پل نشانہ بنائے گئے۔