سیلیکٹ ٹیکنالوجیز کا 2.5 ارب روپے آئی پی او، پاکستان میں اے سی مینوفیکچرنگ کا بڑا منصوبہ

سیلیکٹ ٹیکنالوجیز لمیٹڈ جو ایئر لنک کمیونیکیشن لمیٹڈ کی مکمل ملکیتی ذیلی کمپنی ہے، اپنی آئی پی او کے ذریعے فلوئر پرائس پر 2.489 ارب روپے جمع کرنے کا منصوبہ رکھتی ہے۔ کمپنی پاکستان میں اسمارٹ ڈیوائسز اور گھریلو آلات کی مقامی مینوفیکچرنگ کو وسعت دینے کی خواہاں ہے۔

ایک بیان کے مطابق سیکیورٹیز اینڈ ایکسچینج کمیشن آف پاکستان (ایس ای سی پی ) اور پاکستان اسٹاک ایکسچینج لمیٹڈ (پی ایس ایکس) نے کمپنی کے آئی پی او کیلئے 88,888,889 عام شیئرز کے پراسپیکٹس کی اشاعت، گردش اور اجرا کی منظوری دے دی ہے جو کمپنی کے پوسٹ-آئی پی او ادا شدہ سرمائے کا 10 فیصد بنتے ہیں۔ یہ اجراء بک بلڈنگ طریقہ کار کے ذریعے پیش کیا جائیگا۔

منظور شدہ اسٹرکچر کے تحت ایشو کے 75 فیصد حصے پر مشتمل 66,666,667 شیئرز اہل سرمایہ کاروں کو بک بلڈنگ کے ذریعے پیش کیے جائیں گے جس کے لیے فی شیئر فلوئر پرائس 28 روپے مقرر کی گئی ہے جبکہ زیادہ سے زیادہ قیمت میں 50 فیصد تک اضافہ کیا جاسکتا ہے جس کے مطابق کیپ پرائس 42 روپے فی شیئر بنتی ہے۔

باقی 25 فیصد جس میں 22,222,222 شیئرز شامل ہیں ریٹیل سرمایہ کاروں کو بک بلڈنگ کے عمل کے ذریعے طے شدہ اسٹرائیک پرائس پر پیش کیے جائیں گے۔

آئی پی او کا ریٹیل حصہ مکمل طور پر انڈر رائٹ کیا جائے گا۔

اہل سرمایہ کاروں کی رجسٹریشن 17 جون 2026 سے شروع ہو کر 23 جون 2026 کو ختم ہوگی جبکہ بک بلڈنگ کا عمل 22 اور 23 جون 2026 کو منعقد کیا جائے گا۔ عوامی سبسکرپشن 2 اور 3 جولائی 2026 کو شیڈول ہے۔

عارف حبیب لمیٹڈ اور انٹرمارکیٹ سیکیورٹیز لمیٹڈ اس ایشو کے لیے مشترکہ کنسلٹنٹس کے طور پر خدمات انجام دے رہی ہیں۔

آئی پی او سے حاصل ہونے والی رقم بنیادی طور پر لاہور کے سندر گرین اسپیشل اکنامک زون میں ایک جدید ترین پروڈکشن فیسلٹی کے قیام کیلئے استعمال کی جائے گی جہاں ایئر کنڈیشنرز کی تیاری اور اسمبلنگ کی جائے گی۔

یہ رقم کمپنی کی ٹی وی پروڈکشن لائن کو وسیع کرنے، اسمارٹ فون پلانٹ اور مشینری میں سرمایہ کاری اور ورکنگ کیپیٹل کی ضروریات کو پورا کرنے کے لیے بھی استعمال کی جائے گی۔

سلیکٹ پاکستان میں ژیومی اور ہائسینس سمیت عالمی سطح پر تسلیم شدہ برانڈز کے لیے اسمارٹ فونز، اسمارٹ ٹی ویز، ایئر کنڈیشنرز اور دیگر گھریلو آلات کی تیاری اور اسمبلی میں مصروف ہے۔

“توسیع کے بعد سلیکٹ کی مجموعی سالانہ پیداواری صلاحیت 7 ملین اسمارٹ فونز، 360,000 ٹیلی ویژن اور 400,000 ایئر کنڈیشنر یونٹس تک پہنچنے کی توقع ہے۔ سندر گرین ایس ای زیڈ کی تنصیب سے مالی سال 2035 تک انکم ٹیکس چھوٹ کے ذریعے اسٹریٹجک ٹیکس فوائد ملنے کی بھی توقع ہے جس سے منافع کے مارجن میں بہتری اور طویل مدتی شیئر ہولڈر ویلیو میں اضافہ ہوگا۔

پاکستان کی کیپٹل مارکیٹ نے مضبوط رفتار دکھائی ہے جس میں پاکستان اسٹاک ایکسچینج پر حال ہی میں ہونے والی لسٹنگز نے شاندار منافع دیا اور سرمایہ کاروں کے اعتماد کو تقویت بخشی ہے۔