پاکستان اب معاشی استحکام اور ترقی کی راہ پر گامزن ہے، نائب وزیراعظم اسحاق ڈار

نائب وزیراعظم اور وزیر خارجہ سینیٹر محمد اسحاق ڈار نے نیویارک میں پاکستان کے قونصلیٹ جنرل میں منعقدہ عید ملن استقبالیہ ڈنر کے دوران پاکستانی نژاد امریکی کمیونٹی کے ارکان سے خطاب کیا۔ اس تقریب میں پاکستانی امریکن کمیونٹی کے ممتاز رہنماؤں اور مختلف شعبہ ہائے زندگی سے تعلق رکھنے والے نامور پیشہ ور افراد نے شرکت کی، جہاں اسحاق ڈار نے پاکستان کی قومی تاریخ کے اہم لمحات، علاقائی کردار اور معاشی وژن پر تفصیلی روشنی ڈالی۔

اس موقع پر گفتگو کرتے ہوئے اسحاق ڈار نے کہا کہ مئی کا مہینہ پاکستان کے لیے تاریخی اہمیت کا حامل ہے۔ انہوں نے سابق وزیراعظم نواز شریف کے دور میں 28 مئی 1998 کو کیے گئے جوہری دھماکوں کو یاد کرتے ہوئے کہا کہ ان تجربات نے پاکستان کے قومی عزم کا مظاہرہ کیا اور عالمی سلامتی کے امور میں ملک کا مقام مستحکم کیا۔ نائب وزیراعظم نے مئی 2025 کے واقعات کے دوران پاکستانی عوام اور مسلح افواج کی ہمت، استقامت اور اتحاد کو بھی زبردست خراجِ تحسین پیش کیا۔ انہوں نے اس عرصے کے دوران فیلڈ مارشل سید عاصم منیر، ایئر چیف مارشل ظہیر احمد بابر سدھو اور ایڈمرل نوید اشرف کی قیادت کے کردار کو سراہا۔

اسحاق ڈار کا کہنا تھا کہ وزیراعظم شہباز شریف کی قیادت میں پاکستان استحکام اور سفارت کاری کے مضبوط عزم پر قائم رہتے ہوئے علاقائی اور عالمی امن کے فروغ کے لیے اپنا مثبت کردار ادا کر رہا ہے۔ حکومت کے معاشی ایجنڈے پر روشنی ڈالتے ہوئے انہوں نے افراطِ زر (مہنگائی) میں کمی، کریڈٹ ریٹنگ میں بہتری، بیرونی کھاتوں کے استحکام اور سرمایہ کاروں کے بڑھتے ہوئے اعتماد کو معاشی بحالی کی واضح علامات قرار دیا۔ انہوں نے مزید کہا کہ حکومت برآمدات پر مبنی ترقیاتی حکمتِ عملی پر عمل پیرا ہے جس کا مقصد زرمبادلہ کے ذخائر کو بڑھانا، روزگار کے مواقع پیدا کرنا اور پاکستان کو عالمی سپلائی چین کا حصہ بنانا ہے۔

پاکستانی نژاد امریکی تارکینِ وطن کی تعریف کرتے ہوئے اسحاق ڈار نے اوورسیز پاکستانیوں کو دوطرفہ تعلقات کی مضبوطی، سفارتی وکالت اور سرمایہ کاری کے مواقع پیدا کرنے کے لیے ملک کا سب سے بڑا اثاثہ قرار دیا۔ انہوں نے کمیونٹی پر زور دیا کہ وہ پاکستان میں سرمایہ کاری کریں اور ملک کی مستقبل کی ترقی میں اپنا حصہ ڈالیں۔