ایران مذاکرات میں کچھ پیش رفت، لیکن منزل ابھی دور ہے، مارکو روبیو

امریکی وزیر خارجہ مارکو روبیو نے جمعے کے روز کہا ہے کہ امریکہ نے ایران کے ساتھ بات چیت میں کچھ پیش رفت دیکھی ہے اور پاکستانی ثالثوں کے ساتھ مستقل رابطے میں ہے، لیکن ابھی بہت کام باقی ہے۔

روببِو نے سویڈن میں نیٹو وزرا کی ملاقات کے بعد صحافیوں سے گفتگو میں کہا کہ ”کچھ پیش رفت ہوئی ہے۔ میں اسے بڑھا چڑھا کر نہیں کہوں گا اور نہ ہی کم کر کے۔“

انہوں نے مزید کہا، ”ابھی بہت کام باقی ہے۔ ہم ابھی منزل تک نہیں پہنچے، لیکن امید ہے کہ پہنچیں گے۔“

روببِو نے کہا کہ صدر ڈونلڈ ٹرمپ چاہتے ہیں کہ ایک اچھا معاہدہ طے پائے۔ ان کا بنیادی مسئلہ یہ ہے کہ ایران کے پاس جوہری ہتھیار نہیں ہونا چاہیے اور مستقبل میں یورینیم کی افزودگی، ساتھ ہی آبنائے ہرمز کھولنے کا معاملہ بھی زیرِ بحث آنا چاہیے۔

انہوں نے کہا کہ ”ہم ایک بہت ہی مشکل گروپ کے ساتھ معاملہ کر رہے ہیں، اور اگر صورتِ حال نہ بدلے تو صدر واضح کر چکے ہیں کہ ان کے پاس دیگر راستے بھی موجود ہیں۔“

روببِو نے مزید کہا، ”صدر چاہتے ہیں کہ مذاکرات کے ذریعے اچھا معاہدہ طے پائے، لیکن انہوں نے خود یہ خدشہ بھی ظاہر کیا ہے کہ شاید یہ ممکن نہ ہو۔ لیکن ہم کوشش جاری رکھیں گے۔“

انہوں نے کہا کہ امریکہ مسلسل پاکستانی ثالثوں کے ساتھ رابطے میں ہے جو ایران کے ساتھ بات چیت کی سہولت فراہم کر رہے ہیں۔

جمعہ کو نیٹو اجلاس کے اختتام پر روبیو نے کہا کہ آبنائے ہرمز کے معاملے پر امریکہ کی جانب سے نیٹو سے کوئی مخصوص درخواست نہیں کی گئی، لیکن اگر ایران سپلائی راستہ دوبارہ نہ کھولے تو ایک متبادل منصوبہ تیار ہونا چاہیے۔