سیکیورٹی فورسز کی خیبر میں بڑی کارروائی، فتنۃ الخوارج کے 22 دہشتگرد ہلاک

ضلع خیبر میں سکیورٹی فورسز اور قانون نافذ کرنے والے اداروں نے مشترکہ انٹیلی جنس بیسڈ آپریشن کے دوران 22 دہشتگردوں کو ہلاک کردیا جبکہ فائرنگ کے تبادلے میں ایک کمسن بچہ بھی شہید ہوگیا۔

پاک فوج کے شعبہ تعلقات عامہ (آئی ایس پی آر) کے مطابق ہلاک ہونے والے دہشتگردوں کا تعلق فتنہ الخوارج سے بتایا جاتا ہے۔

آئی ایس پی آر کے مطابق بزدلی اور زندہ پکڑے جانے کے خوف سے دہشتگردوں کی جانب سے اندھا دھند فائرنگ کی گئی جس کے نتیجے میں ایک 10 سالہ بچہ شہید ہو گیا۔

بھارتی سرپرستی میں چلنے والے ان خوارج کے قبضے سے بھاری مقدار میں اسلحہ اور گولہ بارود بھی برآمد کیا گیا ہے۔

آئی ایس پی آر کے مطابق علاقے میں مزید خارجی عناصر کے خاتمے کیلئے کلیئرنس آپریشن جاری ہے، سکیورٹی فورسز اور قانون نافذ کرنے والے ادارے قومی ایکشن پلان کے تحت منظور شدہ وژن عزم استحکام کے تحت دہشت گردی کے مکمل خاتمے کے لیے کارروائیاں جاری رکھیں گے۔

صدر اور وزیراعظم کا سیکیورٹی فورسز کو خراجِ تحسین

صدرِ مملکت آصف علی زرداری اور وزیراعظم محمد شہباز شریف نے ضلع خیبر میں فتنة الخوارج کے خلاف کامیاب آپریشن پر سکیورٹی فورسز کو خراجِ تحسین پیش کیا ۔

صدرِ مملکت آصف علی زرداری نے خیبر ضلع میں مشترکہ انٹیلی جنس آپریشن کے دوران فتنہ الخوارج کے 22 دہشت گردوں کی ہلاکت اور اسلحے کی برآمدگی پر سکیورٹی فورسز کو خراجِ تحسین پیش کیا ہے۔

صدرِ مملکت نے معصوم 10 سالہ بچے کی شہادت پر گہرے دکھ اور افسوس کا اظہار کرتے ہوئے اہلِ خانہ سے تعزیت کی۔انہوں نے کہا کہ دہشت گردی کے ناسور کے خلاف سکیورٹی فورسز اور قانون نافذ کرنے والے اداروں کی قربانیاں قابلِ فخر ہیں۔

صدر آصف علی زرداری کا کہنا تھا کہ ایسے وقت میں جب پاکستان کی قیادت خطے اور دنیا میں امن کیلئے کوششیں کر رہی ہے، دہشتگرد اِن کوششوں کو کمزور کرنا چاہتے ہیں۔

انہوں نے عزم ظاہر کیا کہ پاکستان دہشتگردی کو شکست دے گا اور خطے و دنیا میں امن کیلئے اپنا قائدانہ کردار ادا کرتا رہے گا۔

وزیرِ اعظم شہباز شریف نے ضلع خیبر میں فتنہ الخوارج کے خلاف کامیاب کارروائی پر سکیورٹی فورسز کے افسران و اہلکاروں کی پزیرائی کی ہے۔ انہوں نے کارروائی میں 22 خارجیوں کو ہلاک کرنے پر فورسز کی پیشہ ورانہ صلاحیتوں کو سراہا ہے۔

وزیرِاعظم نے دہشتگردوں کی بلا اشتعال فائرنگ کے نتیجے میں 10 سالہ بچے کی شہادت پر گہرے دُکھ اور رنج کا اظہار کرتے ہوئے شہید کے اہل خانہ کیلئے صبر کی دعا کی اور اس مکروہ فعل کی شدید مذمت کی۔

انہوں نے کہا کہ دہشتگردی کی عفریت کے ملک سے مکمل خاتمے تک اس کے خلاف جنگ جاری رکھی جائے گی۔ وزیرِ اعظم کا کہنا تھا کہ بزدل دہشتگردوں کا اپنے بچاؤ کیلئے بلا اشتعال فائرنگ سے بچے کو شہید کرنا انسانیت کے خلاف ناقابل تلافی جرم ہے۔

انہوں نے اس عزم کا بھی اعادہ کیا کہ دہشتگردی کے خلاف جنگ میں پوری قوم سکیورٹی فورسز کے ساتھ شانہ بشانہ کھڑی ہے۔