پاکستان نے تین ایل این جی کارگو کی خریداری کیلئے ٹینڈر جاری کر دیا

پاکستان ایل این جی لمیٹڈ (پی ایل ایل)، جو حکومت کی ایک ذیلی کمپنی ہے اور عالمی منڈی سے مائع قدرتی گیس (ایل این جی) خریدتی ہے، نے ایل این جی کارگو کی خریداری کے لیے ٹینڈر جاری کر دیا ہے۔

جمعرات کو پی ایل ایل کی جانب سے شائع کردہ اشتہار کے مطابق کمپنی نے بین الاقوامی سپلائرز سے تقریباً 1,40,000 مکعب میٹر کے تین ایل این جی کارگو کے لیے بولیاں طلب کی ہیں۔

پی ایل ایل یہ کارگو ڈیلیورڈ ایکس شپ (ڈی ای ایس) بنیاد پر کراچی کے پورٹ قاسم تک حاصل کرنا چاہتی ہے، جو اپریل اور مئی کے لیے ہوں گے۔

ترسیل کے اوقات 27 تا 30 اپریل، 1 تا 7 مئی اور 8 تا 14 مئی مقرر کیے گئے ہیں۔

اس ٹینڈر کی آخری تاریخ 24 اپریل ہے۔

پی ایل ایل ایک سرکاری ادارہ ہے جو پاکستان کمپنیز آرڈیننس 1984 کے تحت رجسٹرڈ ہے اور وزارت توانائی (پٹرولیم ڈویژن) کے ماتحت کام کرتا ہے۔ یہ ادارہ گورنمنٹ ہولڈنگز پرائیویٹ لمیٹڈ کی مکمل ملکیت ہے۔

ادارے کا بنیادی کام قدرتی گیس، ایل این جی اور ری گیسیفائیڈ ایل این جی کی درآمد، خریداری، ذخیرہ، ترسیل اور تقسیم سمیت مکمل سپلائی چین کا انتظام کرنا ہے۔

اسی تناظر میں پی ایل ایل بین الاقوامی منڈی سے ایل این جی خرید کر مقامی صارفین کو فراہم کرنے کے معاہدے کرتا ہے تاکہ گیس کی مکمل سپلائی چین کو مؤثر طریقے سے چلایا جا سکے۔

کچھ روز قبل آذربائیجان کی سرکاری توانائی کمپنی سوکار نے کہا تھا کہ وہ پاکستان کی درخواست پر فوری طور پر ایل این جی فراہم کرنے کے لیے تیار ہے، کیونکہ پاکستان توانائی کی بڑھتی ہوئی قلت کو کم کرنے کے لیے اسپاٹ کارگوز کی تلاش میں ہے۔

پاکستان، جو توانائی کی ضروریات کے لیے بڑی حد تک گیس پر انحصار کرتا ہے، مقامی پیداوار میں کمی اور عالمی منڈی میں قیمتوں کے اتار چڑھاؤ کے باعث مشکلات کا شکار ہے، خاص طور پر روس-یوکرین جنگ سے پیدا ہونے والی سپلائی میں رکاوٹوں کے پس منظر میں۔

گزشتہ ہفتے وزیر برائے توانائی سردار اویس احمد خان لغاری نے کہا تھا کہ بجلی کی لوڈشیڈنگ اس وقت تک جاری رہے گی جب تک ایل این جی کی سپلائی بحال نہیں ہو جاتی، جو اس وقت قطر کی جانب سے فورس میجر کے اعلان کے باعث دستیاب نہیں ہے۔

ملک کو اس وقت تقریباً 3,400 میگاواٹ بجلی کی کمی کا سامنا ہے، جس کی بڑی وجہ پن بجلی کی پیداوار میں کمی ہے کیونکہ بارشوں اور آبپاشی کی کم ضرورت کے باعث آبی ذخائر سے پانی کا اخراج محدود ہو گیا ہے۔