امریکی نائب صدر جے ڈی وینس اور برطانوی وزیرِاعظم کیئر اسٹارمر کی پاکستان کے کردار کی تعریف

امریکی نائب صدر جے ڈی وینس اور برطانوی وزیرِ اعظم کیئر اسٹارمر سمیت عالمی رہنماؤں نے امریکہ اور ایران کے درمیان مذاکرات میں پاکستان کے کلیدی ثالثی کردار کو سراہا ہے۔

فوکس نیوز کو دیے گئے ایک انٹرویو میں امریکی نائب صدر جے ڈی وینس نے امریکہ اور ایران کے درمیان ثالثی میں اہم کردار ادا کرنے پر وزیرِ اعظم شہباز شریف اور فیلڈ مارشل سید عاصم منیر کی بھرپور ستائش کی ہے۔

جے ڈی وینس نے کہا کہ دونوں (شہباز شریف اور فیلڈ مارشل عاصم منیر) نے بہترین میزبان ہونے کا ثبوت دیا اور دونوں ممالک کے درمیان بات چیت میں معاونت فراہم کر کے اسٹیٹس مین شپ کا مظاہرہ کیا۔

پاکستان کی کامیاب سفارت کاری کی گونج برطانوی پارلیمنٹ میں بھی سنائی دی ہے۔

ریڈیو پاکستان کی رپورٹ کے مطابق برطانوی رکن پارلیمنٹ محمد افضل نے پارلیمنٹ سے خطاب کرتے ہوئے کہا کہ پاکستان امریکہ اور ایران کے درمیان تنازع کے حل میں قائدانہ کردار ادا کر رہا ہے۔ انہوں نے کہا کہ پوری دنیا وزیر اعظم شہباز شریف ، وزیر خارجہ اسحاق ڈار اور فیلڈ مارشل سید عاصم منیر کی مخلصانہ کاوشوں کی مشکور ہے۔

برطانوی وزیراعظم کیئر اسٹارمر نے ایم پی محمد افضل کے ریمارکس کی توثیق کرتے ہوئے امن کے فروغ کے لیے پاکستانی حکومت کی کوششوں پر شکریہ ادا کیا۔

علاقائی امن میں پاکستان کے اس کلیدی کردار کا اعتراف بھارتی فوج کے سابق افسر یشپال مور نے بھی کیا ہے۔

ریڈیو پاکستان کے مطابق ریٹائرڈ بھارتی میجر جنرل مور کا کہنا ہے کہ فیلڈ مارشل عاصم منیر کی قیادت اور بصیرت نے پاکستان کی ثالثی کی کوششوں میں کلیدی کردار ادا کیا ہے۔ انہوں نے مزید کہا کہ پاکستان نے مکمل طور پر غیر جانبدارانہ موقف برقرار رکھتے ہوئے دونوں فریقین (امریکہ اور ایران) کا اعتماد حاصل کیا ہے۔

دریں اثنا کینیڈا کی وزیرِ خارجہ انیتا آنند نے بھی امریکہ اور ایران کے درمیان مذاکرات کی راہ ہموار کرنے میں پاکستان کے کردار کی تعریف کی۔

کینیڈین وزیرِ خارجہ نے اس بات کا اظہار نائب وزیرِ اعظم اسحاق ڈار کے ساتھ ٹیلی فونک گفتگو کے دوران کیا۔

اسحاق ڈار نے تمام فریقین کیلئے جنگ بندی کی اہمیت اُجاگر کرتے ہوئے مذاکرات اور سفارت کاری کے لیے اپنی حمایت جاری رکھنے کے لیے پاکستان کے عزم کا اعادہ کیا۔

دونوں رہنماؤں نے قریبی رابطے میں رہنے پر اتفاق کیا۔