ایران کے سابق وزیر خارجہ کا امریکا سے معاہدہ کر کے جنگ ختم کرنے پر زور

ایران کے سابق وزیر خارجہ محمد جواد ظریف نے ایران-امریکہ جنگ کے خاتمے کے لیے ایک مفاہمتی فارمولا پیش کرتے ہوئے کہا ہے کہ تہران کو چاہیے کہ وہ اپنے جوہری پروگرام کو محدود کرنے اور آبنائے ہرمز کو دوبارہ کھولنے کی پیشکش کرے، جس کے بدلے امریکا سے پابندیاں ختم کرائی جا سکتی ہیں۔

امریکی جریدے فارن افیئرز میں شائع اپنے مضمون میں جواد ظریف نے دعویٰ کیا کہ ایران کو اس تنازع میں برتری حاصل ہے، تاہم انہوں نے زور دیا کہ مزید جانی نقصان اور انفرااسٹرکچر کی تباہی سے بچنے کے لیے جنگ کا خاتمہ ضروری ہے۔ انہوں نے کہا کہ ایران کو اپنی برتری کو جنگ جاری رکھنے کے بجائے فتح کا اعلان کر کے ایک ایسے معاہدے میں بدلنا چاہیے جو نہ صرف موجودہ تنازع ختم کرے بلکہ آئندہ کسی ممکنہ جنگ کو بھی روکے۔

جواد ظریف کے مطابق ایران کو چاہیے کہ وہ اپنے جوہری پروگرام پر حدود عائد کرنے اور آبنائے ہرمز کھولنے کی پیشکش کرے، جبکہ اس کے بدلے تمام معاشی پابندیوں کے خاتمے کا مطالبہ کرے۔ ان کا کہنا تھا کہ ماضی میں امریکا شاید اس طرح کے معاہدے پر آمادہ نہ ہوتا، لیکن موجودہ حالات میں اسکا امکان موجود ہے۔

انہوں نے یہ بھی تجویز دی کہ ایران اور امریکا کے درمیان ایک باہمی عدم جارحیت معاہدہ اور اقتصادی تعلقات کی بحالی بھی ممکن ہونی چاہیے، حالانکہ دونوں ممالک کے درمیان 1979 کے انقلاب کے بعد سے سفارتی تعلقات معطل ہیں۔

جواد ظریف نے خبردار کیا کہ اگرچہ امریکا اور اسرائیل کے خلاف جنگ جاری رکھنا وقتی طور پر اطمینان بخش ہو سکتا ہے، لیکن اس کا نتیجہ صرف مزید انسانی جانوں کے ضیاع اور تباہی کی صورت میں نکلے گا۔