ٹرمپ کا گرین لینڈ کیلئے اسپتال بوٹ بھیجنے کا اعلان

امریکی صدر ڈونلڈ ٹرمپ نے ہفتے کے روز کہا کہ وہ لوزیانا کے گورنر جیف لینڈری کے ساتھ مل کر گرین لینڈ میں ایک اسپتال بوٹ بھیجنے کا منصوبہ بنا رہے ہیں۔ گرین لینڈ، ڈنمارک کا خودمختار علاقہ ہے، جسے ٹرمپ نے پہلے حاصل کرنے کی خواہش ظاہر کی تھی۔

ٹرمپ نے یہ اعلان سوشل میڈیا پر اس وقت کیا جب وہ وائٹ ہاؤس میں ریپبلکن گورنرز کے اعزازی عشائیے کی میزبانی کر رہے تھے اور اسی دوران جیف لینڈری کے ساتھ بیٹھ کر بات چیت بھی کی۔ انہوں نے کہا، لوزیانا کے شاندار گورنر جیف لینڈری کے ساتھ کام کرتے ہوئے ہم گرین لینڈ میں ایک عظیم اسپتال بوٹ بھیجنے جا رہے ہیں تاکہ وہاں بیمار لوگوں کا خیال رکھا جا سکے، جو فی الحال مناسب علاج حاصل نہیں کر رہے۔ یہ راستے میں ہے!“

وائٹ ہاؤس اور جیف لینڈری کے دفتر نے اس پوسٹ پر کسی بھی وضاحت یا جانکاری فراہم نہیں کی کہ آیا جہاز کی درخواست ڈنمارک یا گرین لینڈ نے کی ہے اور کس قسم کے مریضوں کے لیے یہ مدد ضروری ہے۔

ٹرمپ کے اعلان سے چند گھنٹے قبل ڈنمارک کے جوائنٹ آرکٹک کمانڈ نے گرین لینڈ کے پانیوں میں ایک امریکی سب میرین سے ایک عملے کے رکن کو فوری طبی علاج کے لیے نکالا تھا۔

اس وقت یہ واضح نہیں تھا کہ گورنر جیف لینڈری کا اس معاملے سے کیا تعلق ہے یا اس پوسٹ کا اس ایمرجنسی آپریشن سے کوئی تعلق ہے۔ امریکی نیوی کے پاس دو اسپتال بوٹ موجود ہیں، مرسی اور کمفرٹ، مگر یہ لوزیانا میں تعینات نہیں ہیں۔