نیٹو کے ساتھ معاہدے تحت گرین لینڈ تک مکمل اور مستقل رسائی یقینی بنالی، امریکی صدر

امریکی صدر ڈونلڈ ٹرمپ نے کہا ہے کہ انہوں نے نیٹو کے ساتھ ایک معاہدے کے تحت گرین لینڈ تک امریکا کی مکمل اور مستقل رسائی یقینی بنا لی ہے، تاہم معاہدے کی تفصیلات تاحال واضح نہیں ہیں جبکہ ڈنمارک نے زور دیا ہے کہ گرین لینڈ پر اس کی خودمختاری پر بات نہیں کی جاسکتی۔

یہ پیش رفت ایسے وقت سامنے آئی جب ٹرمپ نے یورپ پر ٹیرف عائد کرنے کی دھمکیوں سے پیچھے ہٹتے ہوئے کہا کہ وہ گرین لینڈ کو طاقت کے ذریعے حاصل کرنے کا ارادہ نہیں رکھتے۔ اس بیان کے بعد یورپی منڈیوں میں بہتری دیکھی گئی، تاہم ماہرین کا کہنا ہے کہ حالیہ کشیدگی نے ٹرانس اٹلانٹک تعلقات پر منفی اثرات ضرور ڈالے ہیں۔

گرین لینڈ کے وزیر اعظم جینز فریڈرک نیلسن نے ٹرمپ کے بیان کا خیرمقدم تو کیا، لیکن کہا کہ انہیں کسی بھی ممکنہ معاہدے کی تفصیلات کا علم نہیں۔ ان کا کہنا تھا کہ گرین لینڈ شراکت داری پر بات چیت کے لیے تیار ہے، مگر خودمختاری ایک سرخ لکیر ہے جس پر سمجھوتہ نہیں ہو سکتا۔

نیٹو کے سیکریٹری جنرل مارک روٹے کے مطابق امریکا، ڈنمارک اور گرین لینڈ کے درمیان 1951 کے دفاعی معاہدے کو جدید تقاضوں سے ہم آہنگ بنانے پر مزید بات چیت ہوگی۔ ذرائع کے مطابق مجوزہ فریم ورک میں روس اور چین کی گرین لینڈ میں سرمایہ کاری پر پابندی بھی شامل ہو سکتی ہے۔

ادھر یورپی یونین کے رہنماؤں نے اس پیش رفت پر تشویش کا اظہار کیا ہے، جبکہ ڈنمارک کی وزیر اعظم میٹے فریڈرکسن نے کہا ہے کہ گرین لینڈ کی خودمختاری پر کوئی بات چیت نہیں ہوئی، البتہ آرکٹک خطے کی مشترکہ سلامتی پر تعاون بڑھانے پر غور کیا جا سکتا ہے۔