زرعی شعبے میں بڑی پیش رفت، زاریا لمیٹڈ کا چینی کمپنی کے ساتھ 2 ملین ڈالر کا معاہدہ

زاریا لمیٹڈ نے بدھ کو بتایا کہ اس نے وانگ چوانگ شی جون چانگ ایگری لمیٹڈ کے ساتھ ایک اسٹریٹجک مفاہمتی یادداشت (ایم او یو) پر دستخط کیے ہیں جس کی مالیت طویل مدتی تعاون کے ابتدائی مرحلے کے لیے 2 ملین ڈالر ہے۔

کمپنی نے یہ معلومات پاکستان اسٹاک ایکسچینج کو جاری نوٹس میں فراہم کیں۔

نوٹس کے مطابق کمپنی نے زرعی شعبے سے وابستہ معروف چینی پلیٹ فارم وانگ چوانگ شی جون چانگ کے ساتھ یہ معاہدہ اسلام آباد میں منعقدہ پاک چین انویسٹمنٹ کانفرنس کے موقع پر کیا ہے۔

لسٹڈ کمپنی نے بتایا کہ اس اسٹریٹجک اشتراک کا مقصد وانگ چوانگ شی جون چانگ ایگری لمیٹڈ کے مربوط اور ٹیکنالوجی پر مبنی زرعی ماڈل سے فائدہ اٹھاتے ہوئے پاکستان کے شعبہ زراعت میں ترقی کے مواقع تلاش کرنا ہے۔

اس تعاون کا محور بیجوں کی جدید ٹیکنالوجی متعارف کروانے، ٹیکنالوجی سے لیس زرعی اور فارم سروسز، مزدوروں اور کاشتکاروں کی منظم مینجمنٹ، بڑے پیمانے پر پیداواری نظام کے جائزے اور دونوں ممالک کے درمیان تجارت کو فروغ دینے پر ہوگا۔

نوٹس میں کہا گیا کہ اس شراکت داری کے ذریعے زاریا لمیٹڈ کا مقصد زرعی پیداوار، سپلائی چین کی کارکردگی اور ٹریس ایبلٹی کو بہتر بنانا ہے جب کہ پاکستان کی زرعی ویلیو چین کو جدید خطوط پر استوار کرنے میں تعاون فراہم کرنا ہے۔

زاریا نے کہا کہ اس تعاون سے بین الاقوامی منڈیوں تک رسائی، تکنیکی مہارت کی منتقلی اور چین اور پاکستان کے درمیان مقامی کاشتکاروں اور زرعی کاروبار سے وابستہ افراد کے لیے ممکنہ برآمدی روابط پیدا ہونے کی توقع ہے۔