ٹی ٹوئنٹی ورلڈ کپ : بنگلہ دیش کا آئی سی سی سے میچز کی منتقلی کا مطالبہ

بنگلہ دیش کرکٹ بورڈ (بی سی بی) نے بتایا ہے کہ انٹرنیشنل کرکٹ کونسل (آئی سی سی) کے ساتھ اپنے ٹی ٹوئنٹی ورلڈ کپ کے میچز بھارت سے سری لنکا منتقل کرنے کے حوالے سے تعمیری بات چیت ہوئی ہے۔

سیاسی تناؤ کے باعث حفاظتی خدشات کو بنیاد بنا کر بی سی بی کی جانب سے آئی سی سی کو میچز کی منتقلی کی درخواست کے بعد ورلڈ کپ میں بنگلہ دیش کی شرکت پر غیر یقینی کے بادل منڈلا رہے ہیں۔ بنگلہ دیش ورلڈ کپ کے گروپ سی میں شامل ہے جہاں اسے کولکتہ میں ویسٹ انڈیز، انگلینڈ اور اٹلی کے خلاف کھیلنا ہے، جس کے بعد ممبئی میں نیپال سے مقابلہ ہوگا۔

7 فروری سے 8 مارچ تک جاری رہنے والے اس ٹورنامنٹ کی مشترکہ میزبانی بھارت اور سری لنکا کر رہے ہیں۔ بی سی بی اور آئی سی سی حکام کے درمیان ہفتے کو ڈھاکہ میں ملاقات ہوئی۔

بی سی بی نے ایک بیان میں کہا کہ بات چیت کے دوران بی سی بی نے آئی سی سی سے بنگلہ دیش کے میچز سری لنکا منتقل کرنے کی اپنی باضابطہ درخواست دہرائی ہے۔ بورڈ نے ٹیم، بنگلہ دیشی مداحوں، میڈیا اور دیگر اسٹیک ہولڈرز کے تحفظ اور سلامتی کے حوالے سے بنگلہ دیشی حکومت کے خیالات اور خدشات سے بھی آگاہ کیا۔