وزیر اعظم کی نیشنل ٹیرف پالیسی کے مکمل نفاذ کی ہدایت

وزیرِاعظم شہباز شریف نے بدھ کو نیشنل ٹیرف پالیسی کے مکمل نفاذ کی ہدایت کی اور اسے ملکی صنعتی پیداوار کو فروغ دینے کے لیے ایک انقلابی قدم قرار دیا۔

اسلام آباد میں کسٹمز ڈیوٹی اورتجارتی شعبہ میں دیگر اصلاحات پر قائم کردہ ذیلی ورکنگ گروپ کی سفارشات پر جائزہ اجلاس کی صدارت کرتے ہوئے وزیر اعظم نے کہا کہ ملکی صنعتی پیداوار اور تجارت میں اضافے کے لیے شعبہ جاتی مخصوص تجاویز اور مسائل کی نشاندہی ناگزیر ہے۔

شہباز شریف نے کہا کہ حکومت کی منظور شدہ نیشنل ٹیرف پالیسی ملکی صنعتی پیداوار میں اضافہ کرے گی، یہ پالیسی کاروباری اداروں کو عالمی منڈیوں میں مسابقتی بنانے میں بھی مدد فراہم کرے گی۔

اجلاس کے دوران ملک کے نمائندہ کاروباری حضرات پر مبنی ذیلی ورکنگ گروپ کی طرف سے محمد علی ٹبہ اور دیگر نے وزیراعظم کو کسٹمز اور ٹیکس وصولی سے متعلقہ مسائل سے آگاہ کیا اور اپنی سفارشات پیش کیں۔

وزیراعظم نے ان سفارشات کا خیر مقدم کیا اور ملکی صنعتی پیداوار کو بڑھانے ،کاروباری اور سرمایہ کار حضرات کو ہر ممکن سہولت دینے کے لیے متعلقہ وزارتوں اور اداروں کو خصوصی ہدایات دیں۔

انہوں نے کہا کہ ملکی صنعتی پیداوار اور تجارتی حجم بڑھانے کے لیے شعبہ وار تجاویز ناگزیر ہیں۔ ماہرین کی سفارشات اور اصلاحی تجاویز حقیقی اعداد و شمار پر مبنی ہونی چاہئیں۔

انہوں نے مزید کہا کہ حکومت پیداواری لاگت کو کم کرنے کیلئے اقدامات کر رہی ہے۔ وزیرِاعظم نے متعلقہ حکام کو ہدایت دی کہ وہ دیگر ممالک کے ساتھ دوطرفہ اور عبوری تجارتی اشیاء پر کسٹمز ڈیوٹی کے جمع ہونے کا قریب سے جائزہ لیں۔

اجلاس میں وزیرِاعظم شہباز شریف نے نوٹ کیا کہ دہائیوں سے ایکسپورٹ ڈیولپمنٹ فنڈ (ای ڈی ایف) کو معاشی اور صنعتی پیداوار بڑھانے کے لئے تحقیق اور تربیت پر استعمال نہیں کیا گیا۔

اجلاس میں یہ بھی واضح کیا گیا کہ برآمدات پر مبنی دیرپا معاشی ترقی ملک میں سرمایہ کاری، پیداواری صلاحیت میں اضافے، حکومتی تحفظ اور انفراسٹرکچر کی بہتری سے ہی ممکن ہو سکتی ہے۔

اجلاس میں وفاقی وزیر خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر برائے موسمیاتی تبدیلی ڈاکٹر مصدق ملک، وفاقی وزیر توانائی سردار اویس احمد لغاری، وفاقی وزیر برائے اکنامک افیئرز ڈیژن احد خان چیمہ، وفاقی وزیر پٹرولیم علی پرویز ملک، وزیر مملکت برائے خزانہ اظہر بلال کیانی، وزیراعظم کے معاون خصوصی ہارون اختر، چیئرمین ایس ائی ایف سی، ملکی صنعت و کاروبار کے نمائندگان اور دیگر متعلقہ سرکاری عہدے داران نے شرکت کی۔