فیول آئل کی برآمدات ریکارڈ سطح پر پہنچ گئیں، آئندہ سال مستحکم رہنے کی توقع

صنعتی ذرائع کے مطابق پاکستان کی سالانہ فیول آئل کی برآمدات رواں سال ریکارڈ سطح تک پہنچ گئی ہیں اور توقع ہے کہ آئندہ سال یہ مستحکم رہیں گی یا مزید بڑھیں گی۔ ملکی ٹیکسز میں اضافے نے مقامی خریداری کو کم کر دیا ہے جبکہ بجلی گھر زیادہ ماحول دوست متبادل جیسے کوئلہ اور سولر کی طرف منتقل ہو رہے ہیں۔

تاجروں اور تجزیہ کاروں کے مطابق پاکستان کی برآمدات میں اضافے نے ایشیا میں سپلائی بڑھا دی ہے جس سے پہلے ہی وافر فراہم شدہ مارکیٹ میں قیمتوں پر دباؤ پڑا ہے۔

کیپلر (Kpler) اور ایل ایس ای جی کے شپنگ ڈیٹا سے معلوم ہوا کہ پاکستان کی فیول آئل برآمدات اس سال نئی بلند ترین سطح پر پہنچ گئی ہیں۔

کیپلر کے اعداد و شمار کے مطابق رواں سال اب تک برآمدات 1.4 ملین میٹرک ٹن (تقریباً 8.9 ملین بیرل) سے تجاوز کر چکی ہیں، جو کہ 2024 کے پورے سال کی مقدار سے 16 فیصد زیادہ ہے، اور زیادہ تر برآمدات جنوب مشرقی ایشیا اور مشرق وسطیٰ کو بھیجی گئی ہیں۔

ایل ایس ای جی کے مطابق 2025 میں اب تک برآمدات 1.33 ملین ٹن رہی ہیں، جو گزشتہ سال 1.11 ملین ٹن تھی۔

مارکیٹ ذرائع کے مطابق یہ کارگو زیادہ تر ہائی سلفر فیول آئل (ایچ ایس ایف او) پر مشتمل تھے جو بنیادی طور پر میرین ایندھن کی سپلائی میں استعمال ہوا، جبکہ کچھ مقدار ریفائنریز کو فیڈ اسٹاک کے طور پر بھی گئی۔

رسٹڈ انرجی میں آئل کموڈٹی مارکیٹس کی نائب صدر ویلری پانوپیو نے کہا کہ پاکستان بنیادی طور پر ایچ ایس ایف او ایشیا کو برآمد کرتا ہے، جہاں موسم گرما کے بعد سپلائی میں اضافے کی وجہ سے مارکیٹ میں قیمتوں میں کمی آئی ہے۔

پاکستانی ریفائنرز نے اس سال ٹینڈرز کے ذریعے زیادہ فیول آئل فروخت کیا کیونکہ حکومت نے مقامی کھپت پر ٹیکسز بڑھا دیے ہیں، اہم برآمد کنندگان میں پیک-عرب ریفائنری، سنرجیکو، اٹک ریفائنری، نیشنل ریفائنری اور پاکستان ریفائنری شامل ہیں۔

ملک کی سب سے بڑی ریفائنری سنرجیکو نے کہا ہے کہ اس کا مقصد برآمدات کو بڑھانا ہے۔

کمپنی کے وائس چیئرمین اُسامہ قریشی نے بتایا کہ مالی سال 2024–25 میں کمپنی نے تقریباً 247,000 ٹن فیول آئل برآمد کیا۔

اسامہ قریشی نے مزید کہا کہ وہ توقع کرتے ہیں کہ رواں مالی سال کم از کم 50 فیصد اضافہ ہوگا جسے لائٹ سوئٹ کروڈ کے بڑھتے ہوئے استعمال سے مدد ملے گی جس نے انتہائی کم سلفر والے فیول آئل کی پیداوار میں اضافہ کیا ہے۔

کمپنی نے عالمی تجارتی ادارے ویٹول کے ساتھ شراکت داری کر کے پاکستان کی بندرگاہوں سے کم سلفر بحری ایندھن کی فراہمی بڑھائی ہے۔

ایف جی ای کے آئل مارکیٹ اینالسٹ ژن شوائی ہوانگ نے کہا کہ گزشتہ برسوں میں فیول آئل کی برآمدات میں اضافے نے اس بات کو یقینی بنایا کہ ریفائنری کی پیداواری صلاحیت انونٹری کی حدود سے محدود نہ ہو، جو پچھلے سالوں میں ایک مسئلہ رہا تھا۔

پاکستانی صنعتی ذرائع کے مطابق آئندہ سال برآمدات مستحکم رہنے یا مزید بڑھنے کی توقع ہے۔

پاکستان آئل کمپنیاں ایڈوائزری کونسل کے سکریٹری جنرل سید نذیر عباس زیدی نے کہا کہ فیول آئل کی برآمدات کا رجحان 2026 میں بھی بڑھنے والا ہے۔

نذیر عباس زیدی نے مزید کہا کہ فیول آئل بجلی پیدا کرنے میں اب سودمند نہیں رہا اور پچھلے بجٹ کے بعد مقامی مارکیٹ میں فروخت بھی منافع بخش نہیں رہی۔

پاکستان 2023 میں نیٹ درآمد کنندہ سے نیٹ برآمد کنندہ میں تبدیل ہو گیا تھا۔