لوٹے کیمیکل پاکستان نئی ملکیت میں منتقل، جنوبی کوریا کی پیرنٹ کمپنی کا مکمل انخلاء

لوٹے کیمیکل پاکستان لمیٹڈ نے بدھ کو پی ٹی اے گلوبل ہولڈنگ لمیٹڈ کے ذریعے اپنے حصول کی تکمیل کے بعد ملکیت اور قیادت میں ایک بڑی تبدیلی کا اعلان کیا جو کمپنی سے لوٹے کیمیکل کارپوریشن، جنوبی کوریا کے اخراج کی نشاندہی کرتا ہے۔

پاکستان اسٹاک ایکسچینج (پی ایس ایکس) کو دیے گئے ایک نوٹس میں لسٹڈ کمپنی نے کہا کہ پی ٹی اے گلوبل ہولڈنگ لمیٹڈ نے مجموعی طور پر 1,192,292,329 عام حصص حاصل کر لیے ہیں، جو کمپنی کے جاری کردہ اور ادا شدہ کل سرمائے کا 78.74 فیصد بنتے ہیں۔

یہ حصہ داری لوٹے کیمیکل کارپوریشن سے براہ راست خریدے گئے 75.01 فیصد اور سیکیورٹیز ایکٹ، 2015 اور ٹیک اوور ریگولیشن کے مطابق، باقی حصص یافتگان کو لازمی عوامی پیشکش کے ذریعے حاصل کیے گئے اضافی 3.73 فیصد پر مشتمل ہے۔

نوٹس میں کہا گیا ہے کہ پی ٹی اے گلوبل ہولڈنگ لمیٹڈ نے براہِ راست اور اپنے الحاق شدہ اداروں کے ذریعے کمپنی کے 1,192,292,329 عام شیئرز کا کنٹرول حاصل کر لیا ہے جو کمپنی کے کل جاری اور ادا شدہ سرمایہ کا تقریباً 78.74 فیصد بنتے ہیں جب کہ جنوبی کوریا کی لوٹے کیمیکل کارپوریشن نے کمپنی میں اپنی تمام حصہ داری فروخت کر دی ہے۔

کمپنی نے ملکیت میں تبدیلی کے تناظر میں بورڈ آف ڈائریکٹرز میں بھی اہم تبدیلی کا اعلان کیا ہے۔ متعدد سابقہ ڈائریکٹرز جن میں جو ہیون کوون، یانگ ڈی کیم، سنگ جن پارک، جے سن پارک، چول سوو کیم، راشد ابراہیم، اور خرم رشید شامل ہیں نے فوری طور پر، یعنی 12 نومبر 2025 سے، کمپنی کے بورڈ سے اپنے استعفیٰ دے دیا ہے۔

ان خالی آسامیوں کو پُر کرنے کے لیے بورڈ نے امتیاز احمد، عدنان آفریدی، محمد ظہور الہی چیمہ، فہمیانہ خان، فیصل احمد صدیقی، عثمان اصغر خان، اور شاہد الحسن چٹھہ کو نئے ڈائریکٹرز کے طور پر مقرر کیا ہے۔

اس کے علاوہ، امتیاز احمد کو فوری طور پر چیئرمین مقرر کیا گیا ہے، جو جو یون کوون کی جگہ لیں گے۔ اسی دوران عدنان آفریدی کو کمپنی کا چیف ایگزیکٹو مقرر کیا گیا ہے جو یانگ ڈی کیم کی جگہ کام سنبھالیں گے۔

نوٹس میں مزید کہا گیا کہ کمپنی کے بورڈ آف ڈائریکٹرز میں مذکورہ تبدیلیوں کے نتیجے میں آڈٹ کمیٹی ایچ آر اور ریوارڈ کمیٹی اور شئیر سب کمیٹی کو بھی دوبارہ تشکیل دی گئی ہے۔