ڈالر کی قدر میں اضافے کے ساتھ ہی خام تیل کی قیمتیں گرگئیں

عالمی مالیاتی منڈیوں میں بدھ کے روز وسیع پیمانے پر فروخت کے باعث تیل کی قیمتوں میں کمی دیکھی گئی، جس سے عالمی معیشت اور ایندھن کی طلب میں سست رفتاری کے خدشات مزید گہرے ہو گئے۔ امریکی ڈالر کی قدر میں اضافے اور امریکی خام تیل کے ذخائر میں اضافہ کی اطلاعات نے بھی منڈی کے دباؤ میں اضافہ کیا۔

بینچ مارک برینٹ کروڈ کی قیمت 36 سینٹ یا 0.56 فیصد کمی کے بعد 64.08 ڈالر فی بیرل پر آگئی، جبکہ امریکی ویسٹ ٹیکساس انٹرمیڈیٹ کروڈ 40 سینٹ یا 0.66 فیصد کمی کے ساتھ 60.16 ڈالر فی بیرل پر ٹریڈ ہوا۔ منگل کو بھی خام تیل کی قیمتوں میں کمی کا سلسلہ جاری رہا تھا۔

تیل کی منڈیوں میں یہ کمی اسٹاک مارکیٹوں میں زبردست گراوٹ کے بعد سامنے آئی، جب ایشیائی حصص بازاروں نے وال اسٹریٹ میں راتوں رات ہونے والی کمی کی پیروی کی۔ سرمایہ کاروں کو خدشہ ہے کہ مصنوعی ذہانت سے منسلک کمپنیوں کی قدر ضرورت سے زیادہ بڑھ گئی ہے۔ اس غیر یقینی صورتحال نے امریکی ڈالر کو مضبوط کیا، جو دیگر کرنسیوں کے مقابلے میں اوپر چلا گیا۔

ڈالر کی مضبوطی کے باعث تیل کی قیمتیں مزید دباؤ میں آ گئیں کیونکہ ڈالر میں قیمت طے ہونے والا تیل دیگر کرنسی رکھنے والے خریداروں کے لیے مہنگا ہو جاتا ہے۔

آئی جی مارکیٹ کے تجزیہ کار ٹونی سائکمور کے مطابق خطرے سے گریز کے رجحان میں اضافہ ہوا ہے جس نے امریکی ڈالر کو محفوظ سرمایہ کاری کے طور پر مضبوط کیا، نتیجتاً خام تیل کی قیمتوں میں کمی آئی۔

دوسری جانب امریکی پیٹرولیم انسٹیٹیوٹ کے اعداد و شمار کے مطابق 31 اکتوبر کو ختم ہونے والے ہفتے میں امریکی خام تیل کے ذخائر میں 6.52 ملین بیرل اضافہ ہوا۔

عالمی سطح پر سپلائی میں اضافے کے خدشات بھی قیمتوں پر اثر انداز ہو رہے ہیں۔ تیل برآمد کرنے والے ممالک کی تنظیم اوپیک پلس نے دسمبر میں پیداوار میں 1.37 لاکھ بیرل یومیہ اضافہ کرنے کا اعلان کیا ہے، جبکہ 2026 کی پہلی سہ ماہی میں مزید اضافے کو مؤخر کر دیا گیا ہے۔ تاہم تجزیہ کاروں کا کہنا ہے کہ یہ فیصلہ نومبر اور دسمبر کی قیمتوں کو سہارا دینے میں مؤثر ثابت نہیں ہوگا۔