امن کے قریب پہنچنے کی بھاری قیمت

منگل کے روز برینٹ خام تیل کی قیمت 90 ڈالر فی بیرل سے نیچے آنا مہنگائی سے پریشان دنیا کے لیے کسی حد تک ریلیف کا باعث بننا چاہیے تھا، لیکن بدھ کو ایک بار پھر یہ حقیقت سامنے آگئی کہ واشنگٹن کو اپنی ہی شروع کردہ جنگ کے نتائج پر اب بہت کم اختیار حاصل ہے۔

ایران کی جانب سے افزودہ جوہری مواد حوالے کرنے سے انکار کے بعد تیل کی قیمت دوبارہ 92 ڈالر فی بیرل سے تجاوز کرگئی، جبکہ آبنائے ہرمز میں تیل بردار جہازوں کو حملوں کا سامنا بھی جاری رہا۔ ڈونلڈ ٹرمپ نے اگرچہ بڑے حملوں کو عارضی طور پر روک دیا ہے، لیکن عالمی منڈی کو جنگ بندی کا کوئی واضح اشارہ نہیں ملا۔

یہی اس غیرمعمولی صورت حال کا بنیادی مسئلہ ہے جہاں نہ مکمل جنگ ختم ہوئی ہے اور نہ امن قائم ہوا ہے، جبکہ کسی کو یہ بھی معلوم نہیں کہ اس تنازع کا خاتمہ کس صورت میں ممکن ہوگا۔ وسط مدتی انتخابات میں ریپبلکنز کی شکست کے بعد ٹرمپ کے پاس مزید کشیدگی سے بچنے کی مضبوط سیاسی وجوہات موجود ہیں۔

تاہم فروری میں اسرائیل کے ساتھ مل کر شروع کیا گیا تنازع اب اپنی الگ رفتار اختیار کرچکا ہے۔ خلیجی ممالک کشیدگی میں کمی چاہتے ہیں، قطر اور پاکستان ثالثی کی کوششوں میں مصروف ہیں، جبکہ امریکی افواج کی خطے میں تعداد میں مسلسل اضافہ ہورہا ہے۔ سوال یہ ہے کہ واشنگٹن واقعی جنگ سے نکلنے کا راستہ تلاش کررہا ہے یا محض یہ امید لگائے بیٹھا ہے کہ سیاسی حالات بہتر ہونے تک یہ مشکل جنگ مزید شدت اختیار نہیں کرے گی؟

عالمی تیل منڈی سے توقع کی جارہی ہے کہ وہ ایک غیرمعمولی ہنگامی صورت حال کو معمول کے کاروباری ماحول کے طور پر قبول کرلے۔ برینٹ خام تیل کی قیمت 30 اکتوبر کو 118 ڈالر فی بیرل کی بلند ترین سطح سے 20 فیصد سے زیادہ گر چکی ہے، جس کی بڑی وجہ تاجروں کی جانب سے بڑے پیمانے پر جنگی شدت میں اضافے کے امکانات کو کم اہمیت دینا ہے۔ خلیجی ممالک سے تیل کی برآمدات میں بھی نمایاں بحالی ہوئی ہے۔

توانائی کی ترسیل سے متعلق اعداد و شمار فراہم کرنے والے ادارے کیپلر کے مطابق اکتوبر کے آغاز سے آبنائے ہرمز کے راستے تیل کی ترسیل اوسطاً ایک کروڑ 50 لاکھ بیرل یومیہ سے کم ہوکر ایک کروڑ 50 لاکھ نہیں بلکہ 10.5 ملین بیرل یومیہ رہی، جبکہ جنگ سے پہلے یہ مقدار 13.5 ملین بیرل یومیہ تھی۔ متبادل راستوں کو شامل کرنے کے بعد خلیجی خام تیل کی برآمدات تقریباً جنگ سے پہلے کی سطح پر پہنچ چکی ہیں۔

یہ صورت حال بظاہر اطمینان بخش ہے، لیکن سوال یہ ہے کہ اس بحالی کے لیے بحری جہازوں کو فوجی حفاظتی حصار، محدود بحری راستوں اور پیچیدہ ترسیلی انتظامات کی ضرورت کیوں پیش آرہی ہے؟

مال برداری اور بیمے کے اخراجات اب بھی جنگ سے پہلے کی سطح کے مقابلے میں تقریباً دس گنا زیادہ ہیں۔ خام تیل کی قیمتوں میں کمی کے باوجود بحری جہازوں پر حملے جاری ہیں، جبکہ توانائی کے تنصیبات اور ساحلی پانیوں کو بھی نقصان پہنچا ہے۔

جہازوں کے مالکان اپنے جہازوں کے راستے تبدیل کرسکتے ہیں، بیمہ کمپنیاں پریمیم بڑھا سکتی ہیں اور تیل پیدا کرنے والے ادارے تباہ شدہ تنصیبات کی مرمت کرسکتے ہیں، لیکن ان تمام اقدامات پر بھاری اخراجات آتے ہیں، جو بالآخر مال برداری کے کرایوں، پیداواری لاگت اور صارفین کی قیمتوں میں اضافے کی صورت میں عوام تک پہنچتے ہیں۔

مالیاتی منڈیاں کسی خطرے کے باعث قیمتوں میں شامل ہونے والے اضافی پریمیم کو چند منٹوں میں ختم کرسکتی ہیں، لیکن جنگ سے ہونے والے مادی اور تجارتی نقصانات کی تلافی میں کہیں زیادہ وقت لگے گا۔ امن کی امید پر تیل کی قیمت تو گر سکتی ہے، لیکن اس کے اخراجات کے بل آنا بند نہیں ہوتے۔

یہ فرق امریکی فیڈرل ریزرو کے لیے بھی خاصا تشویش ناک ہوتا جارہا ہے۔ امریکا میں اکتوبر کے دوران صارفین کی قیمتوں میں 0.4 فیصد اضافہ ہوا، جو توقعات سے زیادہ تھا، جبکہ بنیادی مہنگائی کی شرح بھی 0.3 فیصد رہی۔ زیادہ تشویش ناک بات یہ ہے کہ مہنگائی کا پھیلاؤ توانائی کے شعبے سے آگے بھی ہوچکا ہے۔

درآمدی محصولات، مقامی طلب اور سرمایہ کاری کے اخراجات بھی مہنگائی میں اضافے کا سبب بن رہے ہیں، اس لیے پورے مسئلے کا ذمہ دار جنگ کو قرار دینا آسان تو ہوگا لیکن درست نہیں۔ تاہم توانائی کے بحران نے مالیاتی پالیسی کو مزید مشکل بنا دیا ہے اور خام تیل کی قیمتوں میں کمی سے مہنگے ڈیزل، مال برداری اور ریفائننگ کے شعبے میں کئی ماہ سے جاری خلل کے اثرات فوری طور پر ختم نہیں ہوسکتے۔

فیڈرل ریزرو کے گورنر کرسٹوفر والر نے دسمبر میں شرح سود میں 50 بیسس پوائنٹس اضافے کا امکان ظاہر کیا ہے، جبکہ ڈلاس فیڈ کی صدر لوری لوگن نے بھی عندیہ دیا ہے کہ شرح سود میں اضافے کے عمل کو تیز کرنے کی ضرورت پڑسکتی ہے۔

مالیاتی منڈیاں شرح سود میں 25 بیسس پوائنٹس اضافے کو تقریباً یقینی تصور کرچکی ہیں، جبکہ اب بحث اس بات پر ہورہی ہے کہ فیڈرل ریزرو کو مزید کتنی سخت پالیسی اختیار کرنا پڑے گی۔ وائٹ ہاؤس کے لیے، جو بظاہر تیل سستا ہونے کا کریڈٹ لینا چاہتا ہے، قرضوں کا مہنگا ہونا ایک ناخوش گوار پیچیدگی ہے۔ کیا کوئی حکومت مہنگائی پر قابو پانے میں کامیابی کا دعویٰ کرسکتی ہے، جب اس مقصد کے لیے ذمہ دار ادارہ شرح سود میں مزید بڑے اضافے پر غور کررہا ہو؟

امریکی بانڈز میں سرمایہ کاری کرنے والوں نے اس سوال کا جواب دے دیا ہے، اگرچہ مالیاتی منڈیوں کی زبان عموماً سفارتی انداز سے عاری ہوتی ہے۔ منگل کو امریکی 10 سالہ ٹریژری بانڈز پر منافع کی شرح عارضی طور پر 5 فیصد سے تجاوز کرگئی، بعدازاں کم ہوکر 4.99 فیصد کے قریب آگئی، جبکہ دو سالہ بانڈز پر منافع کی شرح میں 18 بیسس پوائنٹس سے زیادہ اضافہ ہوا۔ امریکی ٹریژری بانڈز کی نیلامی میں کمزور طلب نے بھی فروخت کے دباؤ میں اضافہ کیا۔ اس سے چند روز قبل سرمایہ کاروں کو امید تھی کہ کانگریس میں ڈیموکریٹس کا کنٹرول مالیاتی بے اعتدالیوں کو روکنے اور بانڈز کی قیمتوں کو سہارا دینے میں مددگار ثابت ہوگا۔

تاہم اب یہ امیدیں مسلسل برقرار رہنے والی مہنگائی اور فیڈرل ریزرو کی جانب سے شرح سود میں مزید اضافے کے امکانات سے ٹکرا رہی ہیں۔ کانگریس میں سیاسی تعطل قانون سازی کی راہ میں رکاوٹ بن سکتا ہے، لیکن بانڈ مارکیٹ کو ابھی تک ایسا کوئی قانونی طریقہ نہیں ملا جس کے ذریعے مہنگائی کو معطل کیا جاسکے۔

اس کے اثرات صرف امریکی مالیاتی منڈیوں تک محدود نہیں۔ بدھ کو ایشیائی ممالک کے سرکاری بانڈز پر منافع کی شرح میں بھی اضافہ ہوا۔ جاپان میں 10 سالہ بانڈز پر منافع کی شرح 2.8 فیصد کے قریب پہنچ گئی، جبکہ آسٹریلیا میں یہ 5 فیصد سے تجاوز کرگئی۔ امریکی بانڈز پر منافع بڑھنے سے ڈالر مزید مضبوط ہوا، جس کے نتیجے میں بڑی عالمی کرنسیوں پر دباؤ بڑھا اور درآمدی ایندھن اور ڈالر میں قرضوں پر انحصار کرنے والی معیشتوں کے لیے مشکلات پیدا ہوئیں۔

پاکستان یقیناً خام تیل سستا ہونے کا خیرمقدم کرے گا، لیکن اگر سمندری مال برداری مہنگی، ڈالر مضبوط اور عالمی سطح پر قرضوں کی لاگت بلند رہے تو تیل کی قیمتوں میں کمی سے ملنے والا ریلیف کتنا مؤثر ہوگا؟

مصنوعی ذہانت (اے آئی) کے شعبے میں سرمایہ کاری کا تیزی سے بڑھتا ہوا رجحان بھی ان حالات سے متاثر ہورہا ہے۔ ڈیٹا سینٹرز کے قیام کے لیے بھاری سرمایہ اور بجلی درکار ہوتی ہے اور یہ سرمایہ کاری عموماً اس مفروضے پر کی جاتی ہے کہ قابل برداشت شرح سود پر مالی وسائل دستیاب رہیں گے۔ شرح سود میں اضافہ اس کاروباری حساب کتاب کو مشکل بنا رہا ہے، جبکہ سرمایہ کار یہ سوال بھی اٹھا رہے ہیں کہ آیا اے آئی سے متوقع منافع اس قدر بھاری سرمایہ کاری کا جواز فراہم کرتا ہے یا نہیں۔ اس طرح خلیجی ممالک کے بحری تجارتی راستوں کے گرد جاری تنازع ہزاروں میل دور ٹیکنالوجی کمپنیوں کی قدر و قیمت کو بھی متاثر کرسکتا ہے۔

تیل بردار جہازوں سے لے کر سلیکان چپس تک پھیلی عالمی سپلائی چین کا باہمی تعلق مارکیٹ کے پسندیدہ ترقیاتی تصورات کے مقابلے میں کہیں زیادہ طویل اور ٹھوس ہوتا جارہا ہے۔

دوسری جانب ٹرمپ کے لیے دستیاب راستے بھی خاصے مشکل ہیں۔ اگر امریکا نے دوبارہ حملے شروع کیے تو تیل کی قیمتوں میں تیزی سے اضافہ ہوسکتا ہے، جس سے ان کی سیاسی مشکلات مزید بڑھ جائیں گی۔ دوسری طرف ایسا معاہدہ جو تہران کے بنیادی جوہری مطالبات کو برقرار رکھے، اس الزام کو جنم دے سکتا ہے کہ نو ماہ کی جنگ سے کوئی خاطر خواہ نتیجہ حاصل نہیں ہوا۔

جبکہ موجودہ غیر یقینی صورت حال برقرار رکھنے کا مطلب یہ ہے کہ دنیا ایک ایسے ہنگامی بحران کی مسلسل اضافی قیمت ادا کرتی رہے جسے ختم کرنے کے لیے کوئی بھی فریق تیار نظر نہیں آتا۔ وسط مدتی انتخابات نے واشنگٹن کے سیاسی حالات کا حساب کتاب تو بدل دیا ہے، لیکن مالیاتی منڈیوں کے معاشی حساب کتاب میں کوئی تبدیلی نہیں آئی۔

شاید اس مہنگے تعطل کا سب سے بڑا تضاد یہی ہے کہ صدر ٹرمپ اپنے اگلے اقدام پر نظرثانی کا وقت لے سکتے ہیں، لیکن مرکزی بینکوں، جہازوں کے مالکان، کاروباری اداروں اور عام گھرانوں کے لیے اپنے فیصلے مؤخر کرنا ممکن نہیں۔

وائٹ ہاؤس شاید اگلے اقدام کے لیے کسی بہتر موقع کا انتظار کررہا ہے، لیکن باقی دنیا سے آخر کب تک اس انتظار کی مالی قیمت ادا کرنے کی توقع کی جاسکتی ہے؟

کاپی رائٹ : بزنس ریکارڈر 2026