نشاط گروپ کے بعد سفائر فائبرز بھی فیسکو کی نجکاری کی دوڑ میں شامل

سفائر فائبرز لمیٹڈ (ایس ایف ایل) بھی فیصل آباد الیکٹرک سپلائی کمپنی (فیسکو) کی نجکاری کی دوڑ میں شامل ہوگئی ہے۔

یہ پیشرفت ایک روز بعد سامنے آئی جب نشاط گروپ کی کئی کمپنیوں پر مشتمل ایک کنسورشیم نے بجلی کی تقسیم کار کمپنی کی نجکاری کے عمل میں حصہ لینے کا اعلان کیا تھا۔

کمپنی نے جمعہ کو پاکستان اسٹاک ایکسچینج (پی ایس ایکس) کو جاری کردہ نوٹس میں بتایا کہ سفائر فائبرز لمیٹڈ نے نجکاری کمیشن کی جانب سے فیسکو کی نجکاری کے ذریعے نجی شعبے کو منتقل کرنے کے لیے جاری کردہ ریکوئسٹ فار اسٹیٹمنٹ آف کوالیفکیشن (آر ایس او کیو) حاصل کرلیا ہے جس میں وقتاً فوقتاً ترامیم یا اضافے کیے گئے ہیں۔

ایس ایف ایل نے بتایا کہ کمپنی کے بورڈ آف ڈائریکٹرز نے اس لین دین میں شرکت کی منظوری دے دی ہے تاہم کمپنی نے واضح کیا کہ اس نے ابھی تک کوئی پابند ذمہ داری قبول نہیں کی کیونکہ اس کی شرکت نجکاری کمیشن کی جانب سے پری کوالیفکیشن اور تمام ضروری کارپوریٹ و ریگولیٹری منظوریوں سے مشروط ہے۔

سفائر فائبرز نے کہا کہ منظوری ملنے کے بعد وہ ایک کنسورشیم تشکیل دے سکتی ہے۔

گزشتہ سال ایس ایف ایل نے یو سی ایچ پاور (پرائیویٹ) لمیٹڈ جو 586 میگاواٹ کا گیس سے چلنے والا بجلی گھر ہے اور یو سی ایچ-ٹو پاور (پرائیویٹ) لمیٹڈ، جو 404 میگاواٹ کا گیس سے چلنے والا بجلی گھر ہے، دونوں میں 50، 50 فیصد حصص کے حصول کا عمل مکمل کیا۔ دونوں بجلی گھر بلوچستان کے علاقے ڈیرہ مراد جمالی میں واقع ہیں۔

فیصل آباد الیکٹرک سپلائی کمپنی (فیسکو) ان بجلی کی تقسیم کار کمپنیوں (ڈسکوز) میں شامل ہے جن کی نجکاری حکومتِ پاکستان کے منصوبے میں شامل ہے۔ اس کے ساتھ اسلام آباد الیکٹرک سپلائی کمپنی (آئیسکو) اور گوجرانوالہ الیکٹرک پاور کمپنی (گیپکو) بھی نجکاری کے لیے مقرر کی گئی ہیں۔ یہ اقدام توانائی شعبے میں وسیع تر اصلاحاتی ایجنڈے کا حصہ ہے جس کا مقصد کارکردگی بہتر بنانا، بجلی کے نقصانات کم کرنا اور نجی سرمایہ کاری کو راغب کرنا ہے۔ وفاقی کابینہ نے ابتدائی طور پر اگست 2024 میں ان تینوں ڈسکوز کی مکمل نجکاری کی منظوری دی تھی۔

گزشتہ ماہ فیسکو کے لیے اظہارِ دلچسپی جمع کرانے کی آخری تاریخ 7 اگست 2026 تک بڑھا دی گئی تھی۔